DILI, 06 jullu 2022 (TATOLI)—Primeiru-Ministru (PM), Taur Matan Ruak, orienta ona Diretór Sentru Integradu ba Jestaun Krize (CIGC, sigla portugés), Brigadeiru Jenerál, João Miranda ‘Aluk’, atu tun ba terrenu hasoru komisaun ne’ebé daudaun halo verifikasaun dadus ba veteranu luta tinan-24.
Aluk dehan, inisiativa ne’e tanba simu informasaun lubuk ida ne’ebé dehan komisaun sira la’ós ba halo verifikasaun dadus, maibé hamosu asaun irregularidade hanesan julga ema ka kestiona ema-nia partisipasaun iha funu.
“Primeiru-Ministru husu ha’u tun ba hasoru komisaun sira ne’ebé daudaun halo hela verifikasaun dadus veterenu iha terrenu, liuliu parte leste, tanba oeste kazu ladún iha, maibé parte leste iha ema balun komisaun hato’o ona dadus komisaun no hasai tiha nia fixa sira ne’e no balun duni tiha to’o tanis. Atitude ida-ne’e ladi’ak, presiza ko’alia ho sira,” Brigadeiru Jenerál Aluk hateten hafoin hasoru malu ho PM, iha Palásiu Governu, kuarta ne’e.
Notísia relevante: Komisaun Verifikadór halo verfikasaun dadus ba kandidatu veteranu iha Suai Loro
Tuir nia, komisaun nia serbisu mak halo verifikasaun dadus, tanba dadus sira antes ne’e veteranu sira konta sira-nia istória ne’ebé hakerek de’it iha surat-tahan, entaun mai pasa fali ba komputadór ne’e balun iha fallansu, entaun agora komisaun ba fali hodi bolu dadus na’in atu konfirma dadus ne’ebé sira deklara loos ka lae.
“Kona-ba konsidera atu merese rekoñesimentu valorizasaun, ida-ne’e la’os komisaun mak ba haree, maibé Konsellu Nasionál mak sei halo validasaun. Bainhira tama ba kritériu lista benefisiáriu, ne’ebé verifikasaun bainhira ema mai rejistu iha, hatene katak nia hola parte iha prosesu funu, maski nia la halo funu maibé ne’e hola parte no fó tempu ba sira hato’o dadus,” nia akresenta.
Durante prosesu funu tinan-24, oituan ka barak ema hotu fó nia kontribuisaun, nune’e to’o ohin loron Timor-Leste hetan ukun rasik-an no bainhira komisaun omenajen loke prosesu rejistu, ema sira ne’ebé rejista ne’e bainhira ba rejistu nia hatene nia-an katak nia mós halo parte iha prosesu funu naruk.
Jornalista : Arminda Fonseca
Editora : Julia Chatarina
