DILI, INKLUZAUN SOSIÁL, POLÍTIKA

PR kompromete hamutuk ho Rede Feto hakotu violénsia hasoru feto-labarik feto

PR kompromete hamutuk ho Rede Feto hakotu violénsia hasoru feto-labarik feto

Prezidente Repúblika, José Ramos-Horta. Imajen Tatoli/Antonio Daciparu

DILI, 06 jullu 2022 (TATOLI)—Prezidente Repúblika (PR), José Ramos Horta, kompromete hamutuk ho organizasaun Rede Feto Timor-Leste hodi hakotu violénsia hasoru feto no labarik feto iha rai-laran.

Notísia Relevante: SEII-Rede Feto halo sorumutu virtuál ko’alia kona-ba violénsia hasoru feto

Prezidente Organizasaun Redi Feto (FRF), Zelia Fernandes. Imajen Tatoli/Francisco Sony

“Iha enkontru ne’e Prezidente Repúblika rona aprezentasaun hosi Rede Feto no nia akompaña di’ak tebes situasaun sira-ne’e no kompremete atu oinsá mak hamutuk hodi bele hakotu violénsia hasoru feto no labarik feto sira iha Timor-Leste,” Prezidente Rede Feto, Zelia Fernandes, hateten ba jornalista sira hafoin ho ekipa ramata enkontru ho Xefe Estadu iha Palásiu Prezidensiál Nicolau Lobato, Bairru Pite, kuarta ne’e.

Rede Feto Timor Leste simu kazu oioin hosi feto vítima sira no mós labarik sira hanesan vítima violénsia bazea ba jéneru no violénsia doméstika nian ho seluk tan ne’ebé transfere iha FOKUPERS ne’ebé haree ka foku liu ba asisténsia vítima liuhosi uma mahon sira existe iha territóriu.

Prezidente Rede Feto la esplika detallu kona-ba durante ne’e rejista númeru kazu hira tanba nia parte la lembra.

“Ohin, ami aprezenta preokupasaun ba Xefe Estadu atu ita hotu-hotu responsabilidade bele haree oinsá mak halakon ka hakotu kazu violénsia hasoru feto no labarik feto, liu-liu kazu violasaun seksuál ne’ebé agora buras daudaun,” nia dehan.

Lei kontra violénsia doméstika haree ba kazu violénsia hasoru feto no labarik sira mezmu nune’e númeru kontinua aumenta.

“Maibé iha parte ida ita haree katak sosiedade hahú sente katak violénsia hasoru feto no labarik feto ne’e lá’os ona problema uma laran, sira hahú hatene ida ne’e hanesan krime ida tanba ne’e mak keixa iha justisa formál mós kontinua sa’e ka boot,” nia hateten.

Tan ne’e sosializasaun sira-ne’ebé órganizasaun halo kontinua la’o hodi enkoraja sosiedade tomak atu bele brani hateten sai violénsia mak sira hasoru iha sira-nia uma no sira-nia komunidade inklui ninia kauza sira-ne’ebé hasoru.

Rede Feto aprezenta progresu servisu ho dezafiu

Enkuantu durante sorumutu, Prezidente Rede Feto ho ekipa aprezenta mós progresu servisu organizasaun nian desde inisíu estabelese ne’ebé kontribui durante ne’e iha prosesu konstrusaun Estadu no mós ho dezafiu oioin ne’ebé sekretáriadu Rede Feto Timor-Leste hasoru iha ninia funsionamentu loro-loron hanesan fasilidade, rekursu no finanseiru.

“Pedidu audénsia ida-ne’e ami hato’o semana rua liubá kotuk ami husu atu hasoru malu ho Prezidente Repúblika atu introdús kona-ba lala’ok progresu no saida mak Rede Feto iha no mós dezafiu saida mak hasoru ezisténsia tinan 22 dezde 2000 to’o ohin loron,” Prezidente Rede Feto, Zelia Fernandes hateten.

Rede Feto Timor-Leste nu’udar organizasaun mahon ba organizasaun membru 40 ne’ebé hala’o servisu iha área oioin liu-liu kona-ba asuntu direitu feto no labarik feto.

Durante ne’e Rede Feto suporta pilár haat importante hanesan halo advokásia ba asuntu importante ne’ebé feto no labarik feto sira hasoru, kapasitasaun ba iha membru sira nomós ba empoderamentu ba iha feto sira. Nune’e mós, hametin rede servisu no mós monitorizasaun ba lei no enkuadramentu legál nasionál no internasionál sira-ne’ebé la’o daudaun iha rai-laran.

“Empoderamentu ba feto ne’e ita ko’alia buat ida-boot tebes ba iha asuntu oioin, asuntu sosiál, polítiku, ekonómia no asuntu sira seluk tan, ita iha membru 40 ne’e ida-idak ho nia kna,” nia dehan.

Ba asuntu polítiku nian iha organizasaun membru Rede Feto ninian ne’ebé hala’o oinsá asegura partisipasaun feto ninian iha polítika no mós ba iha foti desizaun ninian.

“Ita haree katak asuntu partisipasaun feto ninian iha polítiku ne’e importante duni tanba ne’e mak ho kedas ita-nia advokásia atu tau iha konsiderasaun ba iha konstituisaun hahú hosi inisíu iha ne’ebá artigu lubuk ida-ne’ebé sensivél ba asuntu jéneru, nune’e afirmasaun asaun ne’ebé konkretamente kona-ba feto ida-ne’e lei eleitorál ne’ebé fó duni biban ba feto atualmente iha ita Parlamentu Nasionál 40%,” nia hateten.

Nia hatutan, maske sei iha preokupasaun ba iha nivél partisipasaun feto nia iha nivél lokál hanesan munisipál, suku no aldeia númeru feto ne’ebé signifikante iha ne’ebá no ida-ne’e reprezentasaun feto entermu númeru importante, maibé mós ita hakarak haree katak feto iha duni pozisaun lidera ba iha nasaun no rai ida-ne’e.

“Ko’alia kona-ba empoderamentu ekonómia ita iha organizasaun lubuk ida haree ba ida-ne’e, no empoderamentu polítiku hanesan iha OPMT no mós organizasaun sira seluk hanesan Fundasaun Alola, FOKUPERS nafatin servisu hamutuk,” nia dehan.

Tan ne’e, bainhira hakarak atinje meta igualidade jéneru nian presiza reforsa mós asuntu ekonómia atu nune’e feto bele forte iha área ida-ne’e.

Iha parte seluk, Prezidente Rede Feto ne’e konsidera ho apoiu hosi parseiru dezenvolvimentu sira iha inisiativa oioin iha rai-laran bele kontribui oinsá mak hamenus no halakon violénsia hasoru feto no labarik feto.

“Hanesan inisiativa spotlight ne’ebé iha ida-ne’e, hanesan inisiativa ida-ne’ebé bele tulun organizasaun feto no mós organizasaun oioin sosiedade tomak atu oinsá bele kontribui ba iha halakon no hapara violénsia feto no karik feto,” nia dehan.

Jornalista : Nelson de Sousa

Editór       : Cancio Ximenes

iklan
iklan

Leave a Reply

iklan
error: Content is protected !!