Progresu konstrusaun jardin 59 Viqueque vila atinje ona 85%
VIQUEQUE, 06 jullu 2022 (TATOLI)–Diretór Planu Integradu Dezenvolvimentu Munisipál (PIDM), Domingos de Carvalho, informa, progresu konstrusaun jardín 59 iha postu Viqueque vila daudaun ne’e atinje ona 85%.
“Ita halo ona pagamentu 64,19%. Projetu kapitál dezenvolvimentu ne’ebé jere hosi PIDM iha rua no prevee iha orsamentu 2021, ida maka jardin 59 no seluk mak morru haleu administrasaun munisípiu Viqueque, ne’ebé daudaun ne’e atinje ona 63% no ninia pagamentu realiza ona 54,47%,” Diretór informa ba Agência Tatoli, iha ninia knaar fatin, kuarta ne’e.
Notísia relevante: Munisípiu Viqueque ezekuta ona OJE 2022 ho pursentu 14
Tuir dirijente ne’e, bazeia ba projetu kapitál dezenvolvimentu presiza altera lei, tanba kontratu hahú iha loron 31 agustu 2021 no finaliza iha loron 31 marsu 2022.
“Maibé projetu rua ne’e ninia tempu sei extende, tempu kontratu ninia durasaun fulan-tolu, atu kompleta pagamentu loron 31 jullu 2022. Kestaun balun ne’ebé ami PIDM koloka maka bazeia ba kapitál dezenvolvimentu ita eduka kompañia ho kontratu ne’ebé la altera, lei balun hodi hadi’a. Konserteza kompañia atu implementa projetu lais ne’e susar tanba kompañia sira haree tiha kontratu no halimar fali projetu no kaer projetu rua to’o tolu. Entaun fó impaktu ba kapitál dezenvolvimentu PIDM,” nia akresenta.
Nia dehan, iha formasaun katak PIDM sujere ona altera lei hodi kesi kompañia implementadór sira, bainhira implementa projetu tenki hotu tuir kontratu ho tempu ne’ebé determina tenke hotu.
“Kontratu fulan-neen tenki hotu, bainhira projetu la hotu karik mosu impedimentu ruma no mosu hanesan dalan kotu, stock materiál iha merkadu laiha ka razaun seluk tan. Ho ida-ne’e maka ita bele justifika loron efetivu hodi extede loron serbisu, la’ós ita haree ba kontratu hotu ita kontinua extende, signifika ita la eduka komapañia,” Diretór tenik.
Projetu reabilitasaun jardin 59 responsável hosi kompañia Peaceful unip.Lda, ho kustu $273.301,49 no projetu konstrusaun morru haleu administrasaun munisípiu Viqueque responsável hosi Darda unip, Lda, ho kustu $23.346,66.
Jornalista : Vitorino Lopes da Costa
Editora : Julia Chatarina
