Saúde Bobonaro rejista kazu Diarreia 12 iha suku tolu
BOBONARO, 06 jullu 2022 (TATOLI) – Servisu Saúde Munisípiu Bobonaro iha fulan-junu to’o jullu tinan 2022 rejista ona kazu diarreia hamutuk 12 iha suku tolu ne’ebé pertense ba postu administrativu Maliana, munisípiu Bobonaro.
Xefe Departamentu Programátiku Servisu Saúde Munisípiu Bobonaro, Paulina de Assunção Perreira Deneire, esplika, kazu hirak-ne’e relata hosi ekipa vijilaásia epidemiolojia Hospitál Referál Maliana (HRM) mai hosi suku tolu mak hanesan, Ritabou, Tapo-Memo no suku Holsa.
Notísia relevante: Saúde Bobonaro vasina masál labarik hodi kontra moras Sarampu
Kazu ne’e afeta liu labarik sira iha suku Ritabou komposta hosi aldeia tolu mak hanesan Ti-matan, Diruaben no Samelaun. Enkuantu suku Tapo-memu mak aldeia Ulu-ate no suku Holsa nian mak aldeia Bilicou.
“Labarik na’in-12 ne’ebé baixa iha Hospsital Referál Maliana iha na’in-sia mak halo teste ba iha mikróbiu ka bateria diarreia ne’ebé mak hanaran Ecoly kofirmadu pozitivu, maibé graça a deus sira-ne’e rekupera hotu ona ho saúde ne’ebé di’ak, ita laiha kazu mate,” nia informa ba Jornalista sira, iha kna’ar-fatin, Soso, Maliana, kuarta ne’e.
Daudaun ne’e ekipa vijilánsia servisu saúde munisípiu Bobonaro iha loron-tersa ne’e halo ona intervensaun liuhosi atividade vasinasaun ba labarik sira iha suku Ritabou, aldeia Diru-Aben.
Enkuantu iha loron-kuarta ne’e ekipa saúde halo hela intervensaun ba aldeia rua iha suku Ritabou nia hanesan Timatan no Samelau. Enkauntu sei kontinua ba iha suku Tapo-Memu no Holsa iha tempu badak.
“Ita halo vasina masál ba labarik sira-ne’e atu nune’e bele hasae sira-nia imunidade isin hodi luta kontra moras diarreia, intervensaun sira-ne’e mak ita bele halo hodi labele da’et fali ba labarik sira seluk iha suku tolu ne’e,” nia katak.
Paulina reforsa, moras diarreia ne’e akontese iha tempu bailoron bainhira mosu anin-boot, rai-rahun barak, bee iha posu hahú menus entaun bele provoka moras ne’e afeta ba labarik sira hosi síntoma mak hanesan, té-bén dala-tolu iha oras ida nia laran, kabun moras maka’as no dulas, muta, laran sa’e no isin-manas.
“Bainhira hetan síntoma hirak-ne’e iha uma, tenke hakbesik ba fasilidade saúde ne’ebé besik,” nia fó hanoin.
Xefe departamentu ne’e salienta, moras ne’e akontese kauza tanba inan-aman no komunidade sira ladún iha koñesimentu no la prátika ijiene pesoál, tanba dalaruma prepara ai-han ba labarik sira konsumu ladún tasak didi’ak no bee ne’ebé nono ladún nakali.
Notísia relevante:Saúde Bobonaro husu komunidade ‘hadook-aan’ konsumu ai-han kontaminadu kímiku
Jornalista : Sérgio da Cruz
Editór : Evaristo Soares Martins
