SM detein sidadaun estranjeiru nain-rua ba kazu falsifikasaun dokumentu Estadu
DILI, 06 jullu 2022 (TATOLI)- Liuhosi operasaun ekipa Servisu Migrasaun (SM), kuarta ne’e, konsenge detein sidadaun estrajeiru nain-rua ne’ebé mak halo prátika falsifikasaun ba dokumentu hosi instituisaun Estadu nian atu hetan lukru, iha área Hudi-Laran, Bairru-Pité, munisípiu Dili.
Diretór Jerál SM, Superintendente Asistente Polisia, Luis Barreto, hateten membru hosi servisu operasionál SM nian halo detensun ba sidadaun estranjenjeiru nain-rua, mane ida ho inisiál WX (33) no feto ho inisiál HSJ (33), hosi Fujian-Xina.
“Ita nia membru hosi servisu operasionál halo detensaun ba sidadaun estranjenjeiru nain-rua iha área Hudi-Laran, tanba halo falsifikasaun ba dokumentu,” Diretór Jerál ne’e hateten liuhosi nota ne’ebé Agência TATOLI asesu.
Nia dehan, sidadaun estranjeiru nain-rua ne’e servisu loke rasik ajénsia ida no durante ne’e halo ona falsifikasaun ba dokumentu ofisiál nasaun nian ho sira nia karimbu rasik, hodi halo vistu servisu no pareser legál nian.
“Sidadaun nain rua ne’e rekuñese sira nia aktu no ita lori mai kedas sede sentrál Migrasaun, hodi foti identidade no ita entrega ona ba Komandu Munisipiu Dili (KMD), hodi halo detensaun”, subliña.
Resposavél ne’e , esplika, evidénsia ne’ebe parte ekipa SM rekolla hosi suspeitu nain-rua ne’e maka, karimbu hamutuk 113, kompostu hosi karimbu kompañia 86, karimbu Diretór 21, karimbu Hospital Nasionál Guido Valadares ida no restante husi sira nia ajénsia.
“Ita rekolla mós evidénsia hirak ne’ebé iha no dokumentu balun, hanesan pasaporte no Komputadór desktop hamutuk lima no laptop ida,” nia afirma.
Nia hatutan, “Evidénsia hirak ne’e haruka ona Ministériu Públiku. Ami he’in de’it Prokuradór sira atu haree kazu ne’e ou fó kompeténsia ba sé mak atu haree kazu ne’e, hafoin lori ba Tribunál no Tribunál sei deside bazeia ba lei ne’ebé mak iha”.
Iha sorin seluk, Komandante Munisípiu Dili, Superintendente Xefe Henrique da Costa, konfirma sidadaun nain-rua ne’e detein ona iha sela detensaun Komandu Munisípiu Dili.
“Parte Migrasaun konklui ona investigasaun, maibé tanba sira laiha sala detensaun, entaun sidadaun nain-rua ne’e, ita detein provizóriu iha ne’e, durante oras 72 nia laran, hafoin sei kontinua ba Ministériu Públiku, hodi haree ba parte juridiku nian no halo investigasaun tuir prosesu legál nian,” nia afirma.
Jornalista: Natalino Costa
Editór : Florencio Miranda Ximenes
