iklan

DILI

CCLN sei fó $20,000 ba veteranu grau 0-3 kria grupu buka moris

CCLN sei fó $20,000 ba veteranu grau 0-3 kria grupu buka moris

Prezidente Konsellu Veteranu, Vidal de Jesus "Riak Leman". Imajen TATOLI/Arminda Fonseca.

DILI, 07 jullu 2022 (TATOLI)—Prezidente Konsellu Kombatente Libertasaun Nasionál (CCLN-sigla portugés), Vidal de Jesus “Riak Leman”, hateten CCLN sei fó $20,000 hodi organiza veteranu grau 0-3 atu kria grupu buka moris.

Notísia Relevante: SASCAS no CCLN selebra akordu tau-matan ba grupu veteranu

“Osan $20,000 ami hodi organiza veteranu sira atu bele kria grupu veteranu hanesan grupu haki’ak animál, halo toos no ida-ne’e mak ami atu halo,” Riak Leman hateten ba Agência TATOLI, iha nia knar fatin Comoro, Dili, kinta ne’e.

Nia dehan, osan ne’e besik atu transfere ona tanba agora daudaun ne’e CCLN ho ekipa Servisu Apoiu Sosiedade Sivil no Auditoria Sosiál (SASCAS) halo hela koordensaun.

Riak Leman hateten, CCLN ho SASCAS halo planu ida-ne’e tanba durante ne’e veteranu ho grau 0-3, 4-7 hanesan fali haluhan tiha ka subsídiu ne’ebé sira hetan ne’e la sufisiente, nune’e ho planu ida-ne’e bele fasilita no ajuda sira hodi moris no nesesita sira-nia nesesidade loro-loron nian.

“Tanba grau 4-7 simu dala ida de’it no grau 0-3 entaun la hetan buat ida, entaun planu ho apoiu osan $20,000 ne’e bele halo netik buat ruma iha sira-nia moris. Maibé ida-ne’e liuhosi aprova no validasaun,” nia dehan.

Governante ne’e hateten, parese diskusaun feitu ona no loron 13 fulan-ne’e sei halo asembleia ida, nune’e asina hodi fahe osan ba sira.

“Iha loron 13 fulan-jullu, ami halo asembleia no ita sei konvida Konsellu Veteranu Munisipál hodi mai asina hotu atu partisipa asembleia ne’e, nune’e ita bele hasai despaixu hodi hasai osan uitoan ba munisípiu sira,” nia dehan.

Nia dehan, osan 500,000 ne’e apoiu hosi SASCAS hodi fó apoiu ba sosiedade sivil sira no auditória sosiál ne’ebé mak parte rua halo hela diskusaun.

“Hosi osan ne’e sei distribui ba veteranu munisípiu 12 inklui Rejiaun Administrativa Espesiál Oé-Cusse Ambeno (RAEOA), maibé kada munisípiu hetan $30,000,” Riak Leman hateten.

Maibé ho totál osan ne’e, osan $20,000 ba veteranu grau 0-3 no 4-7 no $10,000 ba edukasaun hodi selu eskola maibé ida-ne’e ba veteranu nia oan de’it.

jornalista : Osória Marques

Editór      : Cancio Ximenes

iklan
iklan

Leave a Reply

iklan
error: Content is protected !!