COVALIMA, 06 jullu 2022 (TATOLI)-Eskola Sekundária Fernando Lasama de Araújo Ainaru, tersa ne’e, distribui ona nesesidade bázika ba estudante sira iha aldeia Mane-ikun, suku Suai Loro, postu administrtaivu Suai, Covalima ne’ebé sofre inundasaun foin lalais ne’e.
Diretora Eskola Sekundária Fernando Lasama Munisípiu Ainaru, Ana Maria Pereira, hateten sasán sira ne’ebé maka entrega hanesan foos, supermi, biskuit, sabaun no seluk.
Notísia Relevante :Vítima inundasaun uma-kain tolu iha Covalima evakua ona ba sentru evakuasaun
“Ami-nia profesór hamutuk 56 no cleaner kontribui depende hosi sira-nia konstribuisaun, orsamentu hamutuk $400.00 ita hodi sosa ai-han,” nia hateten ba jornalista sira iha Suai, hafoin entrega simbolikamente ba Diretór Eskola Sekundária Jerál Suai.
Apoiu ne’e ho objetivu tulun vitima dezastre naturál sira-nia liuliu entermus ai-han no seluk tan hafoin akontese kazu inundasaun udan boot foin lalais ne’e.
“Ami hakarak fó apoiu tanba vítima sira ne’e evakua ba salaun eskola, ami iha hanoin hodi deside katak tuir loloos ami entrega de’it iha diretór eskola tanba vítima sira fila ona sira-nia hela fatin entaun ami lori mai iha aldeia mane-ikun”, nia hateten.
Iha fatin hanesan Diretór eskola Sekundáriu Jerál Públiku Suai, Francelino Freitas Carvalho, agradese ba inisiativa husi eskola Fernando Lasama de Araújo hodi tulun estudante sira ne’ebé sai vitima ba inundasaun.
“Ami agradese Eskola Sekundária Fernando Lasama ne’ebé oferese ai-han bázika ba estudante sira ne’ebé mak afetadu husi inundasaun,” nia hateten.
Oras ne’e, nia dehan fó ona orientasaun ba konsellu estudantil hodi identifika estudante sira iha aldeia Mane-ikun, Suku Suai-Loro, Covalima ne’ebé sai vítima indundasaun hodi hetan apoiu ne’ebé oferese husi eskola Sekundáriu Fernando Lasama de Araújo Ainaro.
Ekipa Komisaun Jestaun Risku Dezastre Naturál (KJRDN) Covalima, daudaun ne’e re-integra ona vitima dezastre naturál hamutuk uma-kain-35 ne’ebé evakua bá sentru evakusaun Eskola Sekundáriu Jerál Suai iha loron 30 fulan-juñu 2022 no iha loron 05 fulan-jullu.
Uma-kain-35 kompostu hosi feto ho idade boot hamutuk ema na’in- 53, mane ho idade adultu na’in-23, labarik kiik tinan lima mai kraik feto na’in-18 no mane na’in-12 no difisiénsia mane rua feto na’in ida
Vitima dezastre naturál hirak ne’e hetan ona apoiu husi Prezidénsia Repúblika, lider nasionál Xanana Gusmão, Ministériu Obra Públika, Cruz Vermella Timor-Leste no seluk tan.
Notísia Relevante :Ekipa konjunta Covalima halo levantamentu dadus ba komunidade afetadu inundasaun
Jornalista :Celestina Teles
Editor : Agapito dos Santos
