Governu hahú halo pagamentu ba idozu-invalidéz iha Suai Loro
COVALIMA, 07 jullu 2022 (TATOLI)–Governu liuhosi Banku Nasionál Komérsiu Timor-Leste (Sigla, Portugés) akompaña hosi pontu fokál Institutu Nasionál Seguransa Sosiál (INSS), hamutuk ho autoridade hahú halo pagamentu subsídiu ba idozu no invalidéz iha suku Suai Loro, postu administrativu Suai, munisípiu Covalima.
Notísia Relevante: Aban, Governu lansa pagamentu $50 ba idozu-invalidéz iha Liquiça
“Ohin, ita hahú pagamentu subsidiu ba idozu no invalidéz ne’ebé tuir oráriu ba loron dahuluk hahú halo pagamentu iha sede suku Suai Loro, postu administrativu Suai, munisípiu Covalima,” Diretór Sentru Solidariedade Sosiál, Agapito Asis Cardoso, hateten ba jornalista iha nia knar, fatin, Suai Loro, kinta ne’e.
Nia informa, iha postu administrativu Suai ne’e kompostu hosi suku Suai Loro ho nia aldeia hanesan Loro, Lo’o, Akar-Laran, Mane-Ikun no Sukabi-Laran.
Tuir oráriu pagamentu hosi Banku Nasionál Komérsiu Timor-Leste (Sigla Portugés), pagamentu ba loron dahuluk hahú iha suku Suai Loro, postu administrativu Suai iha kinta (07/07) ne’ebé sei ramata iha kuarta (13/o7), Tilomar hahú pagamentu iha kinta (14/07) to’o kuarta (20/07).
Iha postu administrativu Maucatar hahú selu iha kinta (21/07) to’o tersa (26/07), Zumalai iha kuarta (27/07) to’o segunda (08/08), Fatululik hahú tersa-kuarta (9-10/08), Fatumea hahú selu iha tersa-kinta (15-17/08), Fohorem hahú iha tersa-kinta 22-25/08) tinan 2022.
Maske simu ona oráriu pagamentu maibé Sentru Solidariédade Sosiál la simu lista pagamentu hosi Ministériu Solidariedade Sosiál no Banku Nasionsiol Komersiu Timor-Leste (BNCTL), nune’e sira lahatene totál orsamentu pagamentu subsídiu ba idozu no invalidéz iha Covalima.
Reprezentante Administradór Munisípiu Covalima, Luzinho do Rego, hateten Governu iha hanoin hasa’e idozu sira-nia osan hosi $30.00 hasa’e ba $50.00 kada fulan, nune’e idozu ne’ebé rejistu kle’ur ona sei simu $300.00
“Iha tinan 2022, ita-nia Governu iha hanoin aumenta uitoan ita-boot sira-nia osan hosi $30 hasa’e ba $50, ho nune’e fulan neen ne’e ita-boot sira simu $300.00 ba tuan ona ba sira-ne’ebé mak foin tama simu sei la hanesan tuir fulan ne’ebe mak aprova iha Sistema,” nia esplika.
Xefe Suku Suai Loro, Martinho Mendonça, husu ba inan-aman sira hafoin simu osan ne’e tenke uza osan ho kuidadu bainhira uza ba nesesidade uma laran.
Governu fó subsidiu ba idosu no invalidéz hodi fasilita benefisiáriu sira moras karik atu sosa ai-moruk no ai-han ruma, osan ne’e uza halo didi’ak.
Tuir dadus hosi Sentru Solidariédade Sosiál Covalima, idozu no invalidéz hamutuk-na’in 6200 ne’ebé iha postu administrativu Suai, Tilomar, Fatumea , Maucatar, Zumalai, Fatululik no Fohorem.
Jornalista : Celestina Teles
Editór : Cancio Ximenes
