DILI, 07 jullu 2022 (TATOLI)–Primeiru-Ministru (PM), Taur Matan Ruak, hateten, daudaun ne’e ekipa hosi Governu iha hela terrenu hodi halo levantamentu dadus ba vítima dezastre naturál no estragu sira ne’ebé afeta hosi dezastre naturál foin lalais akontese iha ponta leste, norte no kosta súl.
Tanba ne’e, iha enkontru semanál entre Xefe Governu no Prezidente Repúblika (PR), José Ramos Horta, aproveita diskute atendimentu lalais ba família vítima afetadu dezastre naturál.
“Ko’alia ho Prezidénte Repúblika kona-ba dezastre naturál ne’ebé akontese iha munisípiu Lautém, Viqueque, Manufahi no Covalima ne’ebé afeta populasaun besik família 900. Ekipa kontinua halo levantamentu dalan saida mak ita bele apoia sira,” PM Taur informa hafoin ramata reuniaun ho Xefe Estadu, iha Palásiu Prezidensiál, Bairru Pité, kinta ne’e.
Notísia relevante: Uma-kain 30 iha suku Afalokai Viqueque afetadu inundasaun
Xefe Ezekutivu dehan, dadus provizóriu vítima dezastre naturál hamutuk 900 no família 30-resin mak evakua.
“Ekipa sira daudaun iha munisípiu kontinua halo levantamentu atu haree loloos populasaun hira mak afetadu, nune’e mobiliza rekursu atu apoiu sira,” nia tenik.
Governu iha dalan rua apoiu vítima, hanesan apoiu família no seluk maka apoiu halo reparasaun ba estragu infraestrutura públika sira hanesan estrada no seluk tan.
Jornalista : Antónia Gusmão
Editora : Julia Chatarina
