iklan

EDUKASAUN, HEADLINE

IES sia devolve $412.452 tanba la konsege ezekuta hotu inzensaun propina

IES sia devolve $412.452 tanba la konsege ezekuta hotu inzensaun propina

Diretór Inspesaun Jerál MESSK, Higino Alves. Imajen TATOLI/Francisco Sony

DILI, 07 jullu 2022 (TATOLI)–Instituisaun Ensinu Superiór (IES) privadu sia devolve filafali osan $412.452 ba kofre Estadu tanba la konsege ezekuta hotu osan pagamentu izensaun propina semestre par ba totál estudante 12.897.

“Hosi Instituisaun Ensinu Superiór privadu no públiku hamutuk 18 ne’ebe hetan apoiu subsídiu inzensaun propina hosi Governu, iha sia maka devolve ona osan ba kofre Estadu,” Inspetór Jerál MESSK, Higino Alves, informa ba Agência Tatoli, iha ninia knaar fatin, Colmera, kinta ne’e.

IES sia ne’ebé devolve osan mak hanesan Institutu Politékniku Betano (IPB), Instituto Filosófico de São Francisco de Sales  (IFFS), Instituto Ciência Religiosa (ICR), East Timor Coffee Institute  (ETCI), Instituto Profissional de Canossa (IPDC), Institutu Boaventura Timor-Leste (IBTL), Institutu Superiór Cristal (ISC), Universidade Orientál (UNITAL) no João Saldanha University (JSU).

Notísia relevante: MF realiza pagamentu inzensaun propina faze daruak ba estudante 66.106

Tuir Inspetór Jerál, totál estudante hosi IES sia ne’ebé konsege hetan pagamentu inzensaun propina hamutuk 6.978 ho osan hamutuk $1.230.039, enkuantu estudante ne’ebé la konsege hetan direitu hamutuk 5.919 ho osan $817.587.

“Ba sira seluk ne’ebé maka seidauk devolve, Ministériu Ensinu Superiór Siénsia no Kultura (MESSK) fó tempu tan ba semana ida,” nia akresenta.

Aleinde ne’e, Inspesaun Jerál ministériu verifika ona relatóriu hosi IES 18 ne’ebé submete ona ba MESSK liuhosi Gabinete Ensinu Superiór no daudaun ministériu fó tempu ba IES sira atu hadi’a rezumu sira hodi devolve fali osan balun ne’ebé la ezekuta hotu ba kofre Estadu.

“Ita-nia fiskalizasaun hodi verifika relatóriu ezekusaun pagamentu propina ne’e konsege deteta iha problema tanba estudante barak la asina lista pagamentu izensaun propina,” nia haktuir.

Nune’e mós, problema seluk mak estudante balun sai ona maibé sira-nia lista kontinua haruka ba ministériu atu hetan pagamentu izensaun propina, tanba ne’e bazeia ba lista no relatóriu sira maka ekipa MESSK halo verifikasaun hodi deteta problema sira.

“Foin maka instituisaun hitu nian, agora sei hein tan instituisaun 11 ninia relatóriu,” Inspetór Jerál tenik.

Jornalista   : Tomé Amado

Editora       : Julia Chatarina

iklan
iklan

Leave a Reply

iklan
error: Content is protected !!