MOP halo ona intervensaun emerjénsia ba estragu infraestrura kauza dezastre naturál
DILI, 07 jullu 2022 (TATOLI)—Relasiona ho akontesementu udan-boot iha semana kotuk iha ponta leste, norte no kosta súl, hodi rezulta infraestrutura públika balun hetan estragu, daudaun ne’e ekipa hosi Ministériu Obra Públika (MOP) halo ona intervensaun urjente.
“Iha parte balun ami halo intervensaun kedas, tanba ita-nia ekipamentu pezadu sira iha munisípiu sira iha hotu hanesan. Parte balun tanba kompañia balun halo hela konstrusaun, entaun sira halo kedas intervensaun,” Ministru Obra Públika, Abel Pires, hateten ba Agência Tatoli, iha ninia knaar fatin, Caicoli, kinta ne’e.
Notísia relevante: MOP orienta empreza normaliza ponte Lapara iha suku Uani-uma Viqueque
Dezastre naturál ne’ebé akontese iha semana kotuk iha munisípiu Covalima, Manufahi, Viqueque, Manatuto, Lautém no Baucau, konsege halo estrada no ponte balun kotu.
Aleinde ne’e, iha semana kotuk hafoin akontese udan-boot, ekipa hosi MOP tuun kedas ba terrenu hodi foti dadus estrada no ponte ne’ebé hetan estragu impaktu hosi udan-boot.
“Ekipa seidauk haruka dadus mai, maibé informasaun provizóriu ne’ebé ha’u rona kona-ba estrada hanesan iha Suai haat, Lautém rua, Viqueque tolu no Ermera ida. Iha mós ponte iha Uatucarbau, Dilor, Welolo maibé halo ona intervensaun urjente,” nia tenik.
Governante ne’e dehan, intervensaun ba ponte halo ona maibé ba ponte sira ne’ebé kotu, sei hasoru difikuldade tanba volume bee maihosi mota boot.
“Entaun difísil atu kontrola, ita tenke halo estrutura ne’ebé permanente maibé ida-ne’e presiza tempu. Ita halo ona intervensaun maibé ita presiza tau própriu atu metin, entaun ita sei presiza halo dezeñu. Daudaun ne’e prepara hela, ita hein antes udan mai, tanba ne’e ita prepara ona, nune’e ha’u husu komunidade pasiénsia oituan tanba ita sei rezolve hotu,” Ministru relata.
Jornalista : Arminda Fonseca
Editora : Julia Chatarina
