DILI, 07 jullu 2022 (TATOLI)—Ministru Obra Públika (MOP), Abel Pires, hateten, tinan ne’e, liuhosi Institutu Jestaun Ekipamentu, Institutu Públiku (IGE, I.P, sigla portugés) sei sosa tan mákina pezadu hamutuk unidade 15.
“Ita-nia mákiza pezadu sira ne’ebé daudaun iha limitadu tebes atu atende ba situasaun dezastre naturál ne’ebé mosu iha fatin-fatin,” Ministru informa ba Agência Tatoli, iha ninia knaar fatin, Caicoli, kinta ne’e.
Notísia relevante: IGE kontrata Indo Traktor halo manutesaun mákina pezadu hamutuk 32
Nia dehan, mákiza sira sei sosa hosi nasaun xina, ne’ebé daudaun Prezidente Institutu Jestaun Ekipamentu, Institutu Públiku (IGE, I.P, sigla portugés), Emenegilda Da Costa, halo hela verifikasaun ba ekipamentu sira iha Indonézia.
“Loloos ne’e ita bá sosa iha Xina, maibé tanba agora ita labele tama Xina, entaun ita kontrata kompañia Xina iha Bali Indonézia atu halo inspensaun ba mákina sira ne’e karik tuir duni ita-nia hakarak, bainhira tuir duni mak kompañia sei hamata sasán tuir inspensaun ne’ebé ita halo ona,” nia akresenta.
Ekipamentu sira ne’e, tuir planu, tarde liu sei to’o inísiu setembru 2022 no ba mákina pezadu unidade 15 ne’e ho kustu millaun $2.
“Bainhira mákiza hirak ne’e to’o mai balun mak sei koloka permanente iha Baucau, Ermera, Bobonaro, fronteira Covalima, no Manatuto,” nia tenik.
Jornalista : Arminda Fonseca
Editora : Julia Chatarina
