DILI, 07 jullu 2022 (TATOLI)—Sentru Nasionál Formasaun Profisionál (CNFP, sigla portugés) Becora, iha trimestre daruak (marsu-juñu) ne’e ezekuta verba Orsamentu Jerál Estadu (OJE) 2022 ne’ebé atinje ona 42,5%.
Notísia Relevante: OJE 2022: HNGV ezekuta 17% iha trimestre dahuluk
“Iha trimestre daruak ne’e, Sentru Nasionál Formasaun Profisionál Becora ezekuta ona 42,5% iha Orsamentu Jerál Estadu (OJE) 2022, ne’ebé ekivalente ho osan hamutuk $613,187,” Xefe Departamentu Administrasaun Finansa, Pedro de Jesus, informa ba Agência Tatoli, iha nia knar fatin, Becora, Dili, kinta ne’e.
Hosi montante orsamentu $613,187 ne’e ezekuta ba kategória rua (2) ne’ebé kompostu hosi saláriu no vensimentu ho nia ezekusaun 42% ho nia saldo $112.560, bens servisu 43% ho nia saldo $490.927.
Tuir nia, iha trimestre daruak ne’e lolos ezekusaun atinje 50% maibé Sentru Nasionál Formasaun Profisionál Becora hasoru difikuldade iha aprovizionamentu entaun labele atinje to’o 50%.
Iha ne’e, nia dehan, maiória materiál ne’ebé CNFP atu sosa hosi kompañia sira, tenke liuhosi prosesu aprovizionamentu liuhosi konkursu entaun iha problema uitoan iha parte aprovizionamentu tanba dala ruma CNFP nia orsamentu kiik, kompañia sira mai sosa tiha dokumentu ba halo kuutasaun no hein dala ruma sira atu mai hatama susar tebes.
“Iha ida no rua mai hatama maibé la tuir kritéria aprovizionamentu entaun ami labele prosesa lalais. Tanba, minimál tenke kompañia tolu halo kompetisaun entaun hosi ne’e ami hein kleur. Entaun, ami tenke halo fali karta ba sira hodi hatama kompletu, hala’o avaliasaun no sé mak prenxe kritériu bele fornese materiál mai ami hodi halo pagamentu. Ho ida-ne’e mak prosesu kleur, hodi ami labele atinji to’o 50% iha trimestre daruak ne’e,” nia informa.
Ho problema ida-ne’e, nia hateten, iha trimestre datoluk ne’e nia garante ezekusaun Orsamentu Jerál Estadu (OJE) 2022 ba Sentru Nasionál Formasaun Profisionál Becora bele atinje liu 75%, tanba prosesu hotu iha trimestre datoluk finaliza hotu ona hosi aprovizionamentu,” nia dehan.
Entretantu, iha portál tranferénsia Orsamentu Jerál Estadu (OJE) 2022 ba Sentru Nasionál Formasaun Profisionál (CNFP, sigla portugés) Becora, nia orsamentu 2022 hamutuk $613,187.00, ne’ebé ezekuta ona 51.7%.
Notísia Relevante: CNFP Becora husu adisionál $129.073 iha KROP
Jornalista : Nelia Fernandes
Editór : Cancio Ximenes
