EKONOMIA, HEADLINE, INTERNASIONÁL, NASIONÁL, POLÍTIKA

PM Taur afirma kadoras tenke dada mai Timor-Leste

DILI, 08 jullu 2022 (TATOLI)–Primeiru-Ministru (PM), Taur Matan Ruak, afirma, VIII Governu Konstitusionál ninia pozisaun klaru katak kadoras tenke dada mai Timor-Leste.

“Ministru Petróleu no Minerál, Víctor da Conceição Soares, Autoridade Nasionál Petróleu no Minerál, Timor GAP, sira deklara ona katak kadoras tenke dada mai Timor, ha’u mak dehan fali labele dada mai ne’e oinsá, ema bele dehan Primeiru-Ministru traidór, trai fali Timor ne’ebé ita hotu konkorda dada mai iha ne’e,” PM Taur hateten hafoin ramata reuniaun semanál ho Xefe Estadu, iha Palásiu Prezidensiál, Bairru Pité, kinta ne’e.

Notísia relevante: Timor-Leste dezmente empreza Woodside hakarak dada kadoras bá Austrália

Xefe Governu argumenta, maski empreza sira defende-nia interese, maibé Timor-Leste mós iha ninia pozisaun.

“Bainhira iha negosiasaun, ita haree dalan ne’ebé di’ak liu no tanba saida, maibé pozisaun ita-nia mak tenki dada mai Timor, tanba uluk Bayu-undan dada ona bá Austrália, agora Greater Sunrise dada fali mai Timor,” nia subliña.

Antes ne’e, Prezidente ANPM, Florentino Soares Ferreira, deklara Timor-Leste dezmente ho deklarasaun empreza konsórsiu iha kampu petrolíferu Greater Sunrise, Woodside ne’ebé hakarak dada kadoras bá Austrália ho razaun katak bainhira dada kadoras mai Timor-Leste, komersialmente la viável no Timor-Leste laiha kompradór.

Jornalista   : Antónia Gusmão

Editora       : Julia Chatarina  

iklan
iklan

Leave a Reply

iklan
error: Content is protected !!