EKONOMIA, HEADLINE, LIQUIÇÁ

PM Taur lansa pagamentu subsídiu $50 ba idozu iha Liquiça

PM Taur lansa pagamentu subsídiu $50 ba idozu iha Liquiça

Primeiru Ministru, Taur Matan Rauk, rei hela ferik ida nia rentos, hafoin entrega tiha osan idozu $50 iha Liquiça. Imajen/ Hortencio Sanchez

LIQUIÇA, 07 jullu 2022 (TATOLI) – Primeiru Ministru (PM), Taur Matan Ruak, kinta ne’e,  hala’o lansamentu ba pagamentu subsídiu ho valór $50 ba idozu hamutuk na’in-224 iha Suku Maumeta, Postu Administrativu Bazartete, munisípiu Liquiça.

“Liquiça hanesan Munisipiu ida ne’ebé primeiru halo lansamentu ba pagamentu ba ita nia inan-aman-sira, ida ne’e prosesu ida importante loos iha ita nia nasaun hodi ajuda inan-aman sira bele hatutan moris ba oin,” Xefe Governu, hateten bai ha lansamentu pagamentu subsídiu ba idozu iha iha Liquiça,

Notsia relevante:  PN aprova subsídiu ba idozu hasa’e ba $50

Xefe Governu agradese ba inan-aman sira hotu ne’ebé partisipa másimu iha lansamentu ne’e hodi simu sira nia direitu.

“La’ós fasil tanba uluk sira simu de’it $30 kada fulan, maibé ita hasa’e ba $50 kada fulan, ida ne’e kontribuisaun Parlamentu Nasionál no Prezidente Repúblika. Tanba iha Orsamentu Jerál Estadu Parlamentu halo aprovasaun, Prezidente promulga no entrega mai Governu atu ezekuta Ezekuta,” PM Taur akresenta.

Biban ne’e, Xefe Governu, afirma Iha Timor-Leste konstrusaun ba sistema seguransa sosiál nian hahú ona iha tinan 2008, ho kriasaun Subsídiu Apoiu nian ba Idozu no Inválidu sira (SAII), ne’ebé iha nia prátika, ho natureza pensaun vitalísia ba sidadaun sira hotu ne’ebé to’o idade reforma nian . Daudaun ne’e tinan 60 no ba ema sira hotu ne’ebé la bele serbisu ho permanente tanba invalidés, no la iha meiu sira seluk ba rendimentu, tanba sira la serbisu.

Nune’e, SAII nu’udar primeira medida seguransa sosiál nian iha nasaun ne’e, moris iha faze ida ne’ebé  harii hela ita-nia instituisaun sira no rekupera krize tinan 2006 nian; moris iha faze ida ne’ebé seidauk ko’alia kona-ba Seguransa Sosiál iha ita-nia sosiedade.

Objetivu SAII nian mak asegura rendimentu mínimu ba ema hotu-hotu ne’ebé labele serbisu tanba sira iha situasaun invalidés nian ne’ebé permanente no absoluta ka tanba iha idade ne’ebé avansada liu ona.

Ho prestasaun ida-ne’e, sidadaun sira-ne’e mantein podér kompra nian balun no bele satisfás nesesidade bázika sira.

Notísia relevante:  AHDMTL apresia PN aprova subsídiu ba idozu hasa’e ba $50

 Tanba ne’e, SAII nu’udar medida esensiál hodi kombate pobreza. Faktu ida-ne’e hatudu hosi dadus estatístiku ofisiál: karik iha tinan 2007 taxa insidénsia pobreza nian iha idozu maka 33,6%, iha tinan 2014 taxa ne’e tuun ba 26,8% ka iha tinan 7, no hafoin kriasaun SAII, taxa insidénsia pobreza nian entre idozu sira redús 20,2%.

“Ida-ne’e maka sinál ida ne’ebé klaru kona-ba importánsia hosi medida ida-ne’e atu kombate pobreza no kontribui ba moris ida ne’ebé dignu ba ita-nia idozu sira,” PM Taur hateten.

Maibé, estudu ida foin daudauk ne’e, tinan 2021, ne’ebé Governu halo ho apoiu UNICEF nian, hatudu katak pobreza multidimensionál nafatin aas, liuliu iha labarik ki’ik no iha idozu sira.

Relasiona ho idozu, fiar katak faktu ida-ne’e kauza hosi fatór rua. Iha sorin ida, tanba pobreza multidimensionál la’ós de’it kona-ba rendimentu, maibé mós kona-ba asesu ba bens no servisus; Iha sorin seluk, tanba valór SAII nian maizumenus ki’ik no la iha alterasaun durante tinan ba tinan. 

Tanba ne’e, deside atu altera valór SAII nian ba $50 kada fulan, hodi reforsa kapasidade ekonómika idozu no ema sira ne’ebé laiha kapasidade permanente hodi halo serbisu. Liu de’it alterasaun ida ba tinan 2022, Governu aprova ona alterasaun ida-ne’e hodi mantein iha futuru.

“Ohin, ita iha-ne’e hodi lansa montante foun SAII nian, hosi $50 fulan-fulan, ne’ebé sei inklui ema ho idozu totál 98.943 no 6.797 iha Munisípiu Likiquiça,” Eis Prezidente Repúblika ne’e afirma.

PM Taur, hatutan “Ita fiar katak, ho nune’e kontribui atu hametin dignidade ita-nia konsidadaun sira nian, hodi kombate pobreza no hodi insentiva atu ema hotu partisipa ho ativu iha ita-nia ekonomia no iha ita-nia sosiedade”.

Hosi totál benefisiáriu pagamentu subsídiu $50 ba idozu hamutuk 98.943 ho valór orsamentu $62.

“Ita nia orsamentu ne’e mak sei selu ita nia inan-aman sira iha Timor laran tomak, parabéns ho lansamentu ida ne’e atu inan-aman hotu bele simu ona sira nia osan iha Banku Nasionál Komérsiu Timor-Leste (BNCTL-sigla Portugés),” nia relata.

Primeiru Ministru mós agradese ba BNCTL ne’ebé ho esforsu hotu koopera ho Governu halo pagamentu ba idozu sira.

“Lori Governu nia naran agradese ba BNCTL ne’ebé koopera di’ak tebes ho Governu hodi halo pagamentu ba ita nia inan-aman sira, maske sira balu hela iha foho tutun ne’ebé karreta ho motór mós liu la di’ak, maibé BNCTL bele lori too ba sira ida-idak nia fatin hodi selu, ne’e esforsu ida ita tenke agradese,” nia hateten.

Entretantu, Benefisiariu Luis Pereira, sente kontente bele simu ona osan ne’ebé fó hosi Governu bele sustenta nia-moris.

“Agradese tebes ba ita nia Governu bele tau matan ona mai ami ferik no katuas, uluk ami simu de’it $180, durante fulan neen ho osan kada fulan $30, maibé agora iha fulan neen nia laran simu $300 tanba hasa’e ba $50,” nia agardese.

Notísia relevante:  PM lansa pagamentu subsídiu $50 idozu iha Liquiçá semana oin

Jornalista: Hortencio Sanchez

Editór     : Florencio Miranda Ximenes

iklan
iklan

Leave a Reply

iklan
error: Content is protected !!