DILI, 07 jullu 2022 (TATOLI)–Primeiru-Ministru (PM), Taur Matan Ruak hetan konvite hosi Prezidente Repúblika (PR), José Ramos Horta, hodi hala’o diálogu ho komunidade munisípiu Ermera iha sábadu (09/07), durante loron tomak.
“Inisiativa Prezidente Repúblika nian katak, iha sabádu ne’e sei ba halo diálogu ho komunidade iha Ermera kona-ba kafé. Ha’u konvidadu mós no ha’u promete ba Prezidente Repúblika, ha’u sei partisipa iha inisiativa ida-ne’e,” PM Taur hateten hafoin ramata reuniaun semanál ho Xefe Estadu, iha Palásiu Prezidensiál, Bairru Pite, kinta ne’e.
Notísia relevante: Vizita Heineken: Horta husu redús importasaun serveja husi rai-liur
Aleinde ne’e, Xefe Governu sei lori mós membru Governu balun nune’e bele responde kedas preokupasaun populasaun sira-nia.
“Ha’u promete partisipa ho ministru balun atu ko’alia no rona komunidade nia preokupasaun,” nia akresenta.
Tuir ajenda hosi Gabinete Prezidénsia Repúblika katak, Xefe Estadu ho komitiva sei hala’o kampaña nasionál reabilitasaun kafé Timor ho tema ‘Hadomi Kafe, Kafe ita-nia kultura, no kampañia nasionál programa nutrisaun ho tema ‘Nutrisaun di’ak, povu saudável, nasaun forte, iha postu administrativu Railaco, munisípiu Ermera, iha parte dadeer.
Hafoin ida-ne’e, PR sei kontinua vizita ofisiál ba postu administrativu Gleno, munisípiu Ermera hodi hala’o diálogu komunitáriu ho tema ‘Kultura ba dame’.
Jornalista : Antónia Gusmão
Editora : Julia Chatarina
