PN adia diskute pedidu autorizasaun PR Horta vizita Indonézia
DILI, 07 jullu 2022 (TATOLI)—Parlamentu Nasional (PN), kinta ne’e, tuir ajenda realiza reuniaun plenáriu extraordináriu atu diskute pedidu autorizasaun Prezidente Repúblika (PR), José Ramos Horta, atu vizita Indonézia maibé adia fila-fali ba loron seluk.
Notísia Relevante: Aban, PN diskute pedidu autorizasaun PR Horta vizita Indonézia
“Ajenda diskusaun ba asentimentu (persetujuan) dezlokasaun Prezidente Repúblika nian meza adia tanba pedidu mai hosi bankada Fretilin,” Prezidente Parlamentu Nasionál, Aniceto Longuinhos Guterres Lopes, hateten iha sala plenária.
Iha reuniaun plenáriu ne’e marka prezensa hosi Deputadu prezente hamutuk na’in-57 no na’in-ualu (8) mak ausente hela.
“Hau ko’alia uitoan ho Xefe Bankada Fretilin sira husu adia, nune’e kontribui di’ak liu ba ita-nia desizaun ida-ne’ebé sei hola kona-ba konsetimentu ne’e. Tanba ne’e, sira husu tempu meza autoriza atu adia mais tarde iha to’o iha loron 13 jullu tenke rezolve ona,” nia dehan.
Aniceto Guterres hateten, tempu sei iha atu diskute pedidu ne’e maibé mais tarde 13 jullu tenke iha ona rezolusaun ba konsientimentu ne’e tanba viajen vizita sei hahú iha 18 jullu 2022.
Nune’e ho pedidu bankada Fretilin nian ne’e, nia dehan, hanoin diskusaun naruk tan ne’e guarda hela bankada sira buka entedimentu.
Enkuantu, iha reuniaun plenária molok hahú atu diskute ajenda pedidu Xefe Estadu nia viajen, Xefe Bankada Fretilin liuhosi intervensaun husu meza atu adia diskusaun ba loron seluk.
“Ajenda ne’e husu adi’a. Ha’u reitera ha’u-nia postura ho naran bankada Fretilin,” David Ximenes “Mandati” hateten.
Iha fatin hanesan Xefe Bankada KHUNTO, Olinda Guterres, nia hanoin tempu ohin PN bele halo ona diskusaun ba ajenda atu diskute pedidu autorizasaun Prezidente Repúblika (PR), José Ramos Horta, atu vizita Indonézia.
“Ha’u hanoin ita vota agora bele ami na’in-ida laiha mós (deputadu KHUNTO ida auzente), ha’u iha esperansa bele liu. Ita tenke aprova ita-nia ulun ba rai-li’ur. Hanesan uluk ne’e ha’u la gosta tanba ne’e tenke vota a-favór,” Olinda Guterres hateten.
Entretantu Vise Bankada PLP, Francisco de Vasconcelos, hateten ajenda Parlamentu Nasionál (PN) ne’e barak loos ne’ebé ajenda ne’ebé iha ona oin ne’e presiza rezolve ona.
“Ajenda Parlamentu Nasionál barak loos ne’ebé ida-ne’ebé iha, ita bele rezolve ohin,” nia dehan.
Jornalista : Nelson de Sousa
Editór : Cancio Ximenes
