DILI, 07 jullu 2022 (TATOLI)—Embaixadór Indonézia iha Timor-Leste, Okto Darinus Manik, ala’o enkontru ho Prezidente Repúblika, José Ramos Horta, hodi ko’alia kona-ba preparasaun vizita ba Indonézia no adezaun Timor-Leste ba ASEAN.
Notísia Relevante: PN adia diskute pedidu autorizasaun PR Horta vizita Indonézia
“Iha vizita Prezidente Repúblika, José Ramos Horta, ba Indonézia ne’e sei ko’alia kona-ba adezaun Timor-Leste ba ASEAN tanba PR sei hasoru mós Sekretáriu Jerál ASEAN iha Jakarta atu bele haree servisu hamutuk iha setór ekonómia, komérsiu no sei esplora tan setór seluk,” Embaixadór Indonézia ne’e hateten ba jornalista sira hafoin ramata sorumutu ho Xefe Estadu iha Palásiu Prezidensiál Nicolau Lobato, Bairru Pite, kinta ne’e.
Aleinde ne’e, nia dehan, iha enkontru ne’e ko’alia mós kona-ba preparativu vizita Prezidente Repúblika, José Ramos Horta, atu hala’o vizita ba Indonézia.
“Enkontru ho Prezidente Repúblika ko’alia liu kona-ba preparativu tékniku sira vizita PR nian ba Indonézia no ida-ne’e hanesan faze dahuluk ko’alia liu kona-ba saida mak ita bele halo atu fasilita viajen ne’e,” nia dehan.
Tanba ne’e, daudaun ne’e hahú haree ajenda PR nian bainhira to’o iha Indonézia sei hasoru malu ho sé-sé, mezmu daudaun seidauk fó sai ajenda fiksu maibé ekipa hanoin prepara daudaun no bainhira iha mudansa ajenda ruma sei relata fila-fali.
“Viajen PR ne’e sei susesu liu tan atu bele hasa’e intensidade relasaun Indonézia no Timor-Leste” Nia hateten.
Iha enkontru ne’e, Prezidente Repúblika hato’o katak vizita ba Indonézia ne’e nu’udar kompromisu PR nian atu halo bainhira eleitu ba PR.
Jornalista : Nelson de Sousa
Editór : Cancio Ximenes
