Top

PR kondekora Andrew Jacobs ho medalla Grau Orden Kolár Timor-Leste

Prezidente Republika, José Ramos Horta, hafoin atribui medalla Grau Orden Kolár Timor-Leste ba Embaixadór Uniaun Eropeia, Andrew Jacobs, iha Palásiu Prezidensiál Nicolau Lobato, Bairru Pite, kinta (07 jullu 2022). Imajen Tatoli/

DILI, 07 jullu 2022 (TATOLI)—Prezidente Repúblika (PR), José Ramos Horta, liuhosi dekretu PR númeru 55/2022, 06 jullu, kondekora Embaixadór Uniaun Europeia (UE), Andrew Jacobs, ho medalla Grau Orden Kolár Timor-Leste.

Orden Timor-Leste kria hosi dekretu-lei númeru 20/2009, 06 maiu, ba prestíjiu no dignidade, demostra rekuñesimentu Timor-Leste ba sidadaun nasionál ho estranjeiru iha atividade profisionál, sosiál ka aktu espontánea erosidade ka altruizmu ne’ebé kontribui signifikativu fó benefísiu ba Timor-Leste ka umanidade.

Embaixadór Andrew Jacobs presta servisu alta importánsia ba povu Timor-Leste iha setór oioin ba prosesu dezenvolvimentu nasionál iha relasaun entre Uniaun Europeia ho Timor-Leste.

“Embaixadór Andrew Jacobs kumpre nia misaun iha Timor-Leste durante iha ne’e, ne’ebé sei fila ba Bruxelas Komisaun Europeia, depois tinan hirak ne’e hala’o misaun ramata iha ita-nia nasaun. Ne’ebé, (medalla) ne’e hanesan rekuñesimentu hosi Estadu no Governu Timor-Leste,”  Xefe Estadu ne’e hateten iha nia diskursu iha serimónia kondekora Embaixadór UE ne’e iha Palásiu Prezidensiál Nicolau Lobato, Bairru Pite, kinta ne’e.

Embaixadór Andrew Jacobs kumpre nia misaun iha Timor-Leste durante iha ne’e, UE sempre iha relasaun amigu di’ak tebes no solidáriu ho ativu ho apoiu ba Estadu Timor-Leste iha área dezenvolvimentu Estadu hanesan demokrásia, ekonómia no apoiu mós sosiedade sivíl iha programa setór ambientál ba reflorestasaun iha territóriu laran hanesan iha Baucau, Baguia, Venilale, Suai, Ossu no seluk tan.

Iha fatin hanesan, Embaxadór Uniaun Eurepia (UE), Andrew Jacobs, sente triste tanba tenke husik Timor-Leste.

Prezidente Republika, José Ramos Horta, hafoin atribui medalla Grau Orden Kolár Timor-Leste Embaixadór Uniaun Eropeia, Andrew Jacobs. Imajen Tatoli/

“Ha’u sente triste tebes husik Timor-Leste liu tiha tinan tolu. Ha’u hadomi tebes nasaun furak ida-ne’e no ha’u sei la haluha timoroan sira no durante ha’u hela iha ne’e hakslok tanba Timor-Leste no Uniaun Europeia sai ona parseiru ne’ebé besik no metin liu. Ita fahe valór xave sira hanesan demokrásia, direitu umanu no multilateralizmu,” nia hateten.

Timor-Leste hanesan parseiru ida-ne’ebé importante tebes ba UE iha Sudueste Aziátiku tanba servisu atu aumenta prezensa no influénsia iha rejiaun ne’e.

Durante ninia mandatu, Embaixadór ne’e nia tempu iha Timor-Leste, Uniaun Eurepia (UE) mós hametin ona ninia kooperasaun dezenvolvimentu nian ho TL no UE kontinua fornese apoiu hosi orsamentu diretu no servisu besik liu ho Governu no sosiedade sivíl iha área nutrisaun, agroflorestál, mudansa klimátika, jestaun finanseira públika no desentralizasaun.

“Ita agora servisu hela iha programa foun ida haree liu ba diversifikasaun ekonomika, dezenvolvimentu setór privadu no formasaun profisionál. UE mós apoiu Timor-Leste nia preparasaun tékniku ba adezaun ASEAN,” nia dehan.

Iha parte seluk, nia sente nu’udar privilejiu ida atu haree prosesu demokrátiku ne’ebé funsiona ho di’ak iha TL durante eleisaun prezidensiál, ne’ebé hakslok tebes bele hola parte iha misaun no observasaun eleitorál Uniaun Europeia nian no sai sásin demokrásia ba asaun iha Timor-Leste.

“Agradese ba Prezidente Repúblika, Governu no povu Timor-Leste ba exelente kooperasaun amizade iha tinan tolu ikus ne’e, ne’ebé momentu interresante iha ha’u-nia karreira no Timor-Leste sempre iha ha’u-nia fuan,” nia hateten.

Jornalista : Nelson de Sousa

Editór       : Cancio Ximenes

Publisidade

Leave a Reply

Latest Post

error: Content is protected !!