iklan

EKONOMIA, BOBONARO, HEADLINE, MUNISÍPIU

Abitante Ritabou kestiona kompañia kahur produtu ‘fuhuk’ iha Cesta Bázika

Abitante Ritabou kestiona kompañia kahur produtu ‘fuhuk’ iha Cesta Bázika

Abitante sira iha suku Ritabou, postu administrativu Maliana, munisípiu Bobonaro, hatudu hela produtu fuhuk ne'ebe fornesedór sira inklui iha pakote Cesta Bázika. Imajen Tatoli/Sérgio da Cruz.

BOBONARO, 08 julu 2022 (TATOLI) – Abitante suku Ritabou, postu administrativu Maliana, munisípiu Bobonaro, kestiona kompañia fornesedór kahur produtu ‘fuhuk’ iha distribuisaun programa Cesta Bázika.

Governu liuhosi Ministériu Turizmu, Komérsiu no Indústria (MTCI, sigla portugés), sesta ne’e halo lansamentu ba distribuisaun programa Cesta Bázika faze daruak iha suku Ritabou, postu administrativu Maliana, muinisípiu Bobonaro.

Programa ne’e lansa hosi Ministru Koordenadór Asuntu Ekonómiku (MAKE), Joaquim  Amarál no akompaña hosi Ministru Agrikultura no Peska (MAP), Pedro dos Reis.

Notísia relevante:MKAE husu distributór Cesta Bázika kumpre utiliza produtu lokál 75%

Totál benefisiáriu programa Cesta Bázika iha suku Ritabou hosi totál aldeia 12 hamutuk na’in-8,41 komposta hosi mane na’in-4,022 no feto 4.012 ho totál xefe família 1.730.

Komunidade Ritabou, Gregorio Duarte Barros, agradesde ba governu tanba programa ne’e benefísia duni povu, maibé nia lamenta ho kompañia fornesedór Bobolait tanba produtu sira-ne’ebé simu balun fuhuk ona no até balun dodok.

Komunidade suku Ritabou, Gregorio Duarte Barros. Imajen Tatoli/Sergio da Cruz.

“Ita fahe sasán ne’e ba ema la’ós ba animál, tanba repollu ne’ebé ami simu dodok hotu, ida-ne’e oinsá mak ami bele haan, depois koto sira-ne’e mós maioria fuhuk hotu ona. Ida-ne’e ami sente katak kuandu ita haan ne’e la di’ak ba ema-nia saúde,” nia informa ba Jornalista sira, hafoin simu programa Cesta Bázika ne’e.

Nia observa katak, pakote Cesta Bázika ne’e item balu la kompletu, tanba iha tinan kotuk simu ho na’an, maibé iha tinan ne’e la inklui na’an, tanba na’an iha proteína di’ak atu dezenvolve ema-nia kresimentu isin.

“Ha’u rekomenda ba governu atu kontrola fornesedór sira molok distribui ba komunidade tanba bainhira la halo verifikasaun didi’ak ai-han sira-ne’e mak sei fó impaktu negativu ba ami-nia saúde, ami haan hotu invez saúde di’ak, maibé moras fali,” nia dehan.

Benefisiária Maria Afonso João, husu fornesedór atu responsabiliza tanba produtu lokál hanesan koto no fore-mungu ne’ebé inklui iha pakote laran ne’e sosa kuaze tinan ida ka rua resin ona.

“Repollu sira-ne’e ular oan iha, depois hudi ne’ebá ne’e la tasak, mesak hudi matak de’it mak fó mai ami, sasán sira-ne’e ami lori ba da’an hanesan de’it, konserteza la dodok ida, ne’ebé sasán ne’ebé di’ak ami bele simu lori ba uma, maibé ida-ne’ebé la di’ak ami lakohi simu, hasai tiha kedas,” nia hateten.

Atividade distribuisaun ne’e akompaña hosi Komisaun Antí Korrupasaun (CAC, sigla portugés), Provedoria Direitu Humanu no Justísa (PDHJ).

Enkuantu molok distribui produtu ba benefisiáriu sira, ekipa Autoridade Inspesaun no Fiskalizasaun Atividade Ekonómiku, Sanitária no Alimentár, Institutu Públiku (AIFAESA,I.P) halo uluk verifikasaun.

Diretór Kompañia Bobolait Unipesoál Lda, Carlito Salavador Perreira, rekoñese produtu sira hanesan koto to’o ona tempu ona atu ‘lahuk’ tanba rai iha armazein kuaze fulan tolu resin ona, maibé kompañia laiha intensaun atu fó sasán ladi’ak ba komunidade sira konsumu.

Diretór kompañia fornesedór Bobolait, Carlito Salavdor Perreira. Imajen Tatoli/Sérgio da Cruz.

“Antes atu fahe ami dehan ona, sé koto ne’e mak ladún di’ak, labele estraga, ami mós tenke koopera tanba populasaun sente la di’ak, ne’e duni ami sei mai fali iha segunda volta troka fali ho koto seluk, maibé kona-bá repollu no hudi sira-ne’e ami sosa hosi komunidade sira iha-ne’e,” nia dehan.

“Ita hatene agora na’an fahi agora ne’e maioria na’an importadu, depois ami atu oho karau maibé ami mai horisehik labele oho, sé semana oin hanesan ami bele oho karau,” nia subliña.

Iha intervensaun, Ministru Koordenadór ba Asuntu Ekonómiku (MAKE), Joaquim  Amarál, esplika, programa Cesta Bázika governu implementa atu rekupera ekonomia nasionál ho medida sira hanesan estímula produsaun agríkola no kria merkadu ba indústria iha rai laran.

“Programa ida-ne’e moos ita-boot sira simu ai-han atu hamenus kbiit atu sosa, osan sira-ne’e ita- boot sira iha rai hela, hodi sosa fali sasán seluk, ita tenke hanoin atu hasa’e produsaun hodi halo mudansa ba ita-nia aan rasik no ba nasaun nune’e labele dependénsia ba rai liur,” governante ne’e dehan.

Nia akresenta, programa ne’e atu motiva  agrikultór sira, komersiante sira, idak-idak halo nia atividade atu prodús, komersiante sira sosa sasán, produtór sira kontinua hasa’e produsaun hodi distribui ba merkadu.

Atividade ne’e partisipa hosi ministériu implementadór sira, Sekretáriu Autoridade Munisípiu Bobonaro, João Fátima do Carmo, Administradór Postu Administrativu Maliana, Tomás Lacu-loe, Segundu Komandante PNTL Munisípiu Bobonaro, Asistente Superintendente Fásio de Jesus Lima, lideransa komunitária no benefisiáriu sira.

Jornalista   : Sérgio da Cruz

Editór         : Evaristo Soares Martins

iklan
iklan

Leave a Reply

iklan
error: Content is protected !!