DILI, 08 jullu 2022 (TATOLI)–Diretór Servisu Edukasaun Munisípiu Dili (SEMD), Carlito da Silva, relata dadus provizóriu estudante ensinu báziku, ensinu sekundáriu jerál no tékniku vokasionál iha munisípiu Dili hamutuk 17.283, sei partisipa iha ezame nasionál iha outubru tinan ida-ne’e.
“Ha’u hakarak informa katak totál dadus provizóriu estudante finalista 17.283 mak atu partisipa iha ezame nasionál, kompostu hosi estudante ensinu báziku iha 7.108 (feto 3.382 no mane 3.626), estudante ensinu sekundáriu jerál iha 9.045 (feto 4.695 mane 4.363) no estudante tékniku vokasionál iha 1.130 (seidauk iha klasifikasaun),” Diretór ne’e relata iha edifísiu SEMD, Comoro, sesta ne’e.
Notísia relevante: Estudante 50.752 aprovadu ezame nasionál no 18 la pasa
Maski nune’e, Ministériu Edukasaun Juventude no Desportu (MEJD) sei halo nafatin verifikasaun númeru estudante sira ho parte eskola, atu nune’e bele iha biban hadi’a lista ne’ebé aprezenta ona mai Diresaun Servisu Edukasaun Dili.
“Ami foin halo tan konfirmasaun ho dirijente hosi eskola São Miguel, ne’ebé sira mós hahú hadi’a ona dadus estudante, nune’e mós ho dirijente eskola Manleuana nian, tanba dadus estudante finalista anteriór nian ne’ebé ita simu iha 300, maibé sira foin mak mai hadi’a fali hodi aumenta 314,” nia akresenta.
Diretór ne’e preokupa ho númeru estudante provizóriu 17.000 resin ne’ebé rejista ona iha SEMD, tanba presiza mós sala aula sufisiente atubele akumula estudante sira, tanba ne’e SEMD presiza tan sala aula 478 ba vijilánsia 958, atu nune’e estudante sira bele partisipa ezame ne’e ho di’ak.
Aleinde ne’e, profesór sira atu halo kontrola iha prosesu ezame nasionál ne’e la sufisiente. Tanba ne’e, nia sei husu tan apoiu profesór voluntáriu 200 resin hodi ajuda halo vijilánsia iha tempu ezame nasionál tanba atu foti profesór permanente hosi ensinu báziku bele difikulta prosesu sira, entaun uza profesór voluntáriu sira.
“Maibé profesór voluntária sira sei la hetan direitu atu prienxe akta ezame nasionál, maibé sira iha de’it direitu atu halo vijilánsia iha tempu ezame nia-laran,” nia tenik.
Jornalista : Tomé Amado
Editora : Julia Chatarina
