Governu estende ona pesoál saúde 46 iha Covalima nia kontratu
COVALIMA, 08 jullu 2022 (TATOLI)—Governu liuhosi Ministériu Sáude (MS) estende ona pesoál saúde na’in-46 iha munisípiu Covalima nia kontratu ne’ebé antes ne’e ramata iha fulan-juñu nia rohan.
Pesoál saúde na’in-46 ne’e, antes ne’e Governu liuhosi Ministériu Saúde halo kontratu ba sira hodi presta servisu ba kombate pandemia COVID-19 iha Timor-Leste, ne’ebé destaka ba postu sáude no sentru saúde sira iha postu administrativu sira iha Covalima.
Notísia Relevante: PN sujere MS rekruta pesoál saúde presta servisu iha COVID-19 sai permanente
Diretóra Servisu Saúde Munisípiu Covalima, Maria de Fátima Moniz, hateten pesoál saúde na’in-46 ne’e ema na’in-ida (1) sai ona funsionáriu permanente tanba foin lalais konkore iha vaga no pasa iha teste vaga rejime espesiál, nune’e falta de’it na’in-45 mak asina ona sira-nia kontratu iha sesta (01/07) tinan ne’e.
“Prosesu kontratu ba pesoál saúde na’in-46 ne’ebé sira-nia kontratu ramata iha fulan-juñu nia rohan, halo ona estensaun ba sira-nia kontratu ho durasaun tempu fulan neen (6). Sira ne’e, ami koloka ona ba postu saúde ne’ebé laiha infermeiru no infermeira,” Maria de Fátima Moniz hateten ba Agência Tatoli, iha resintu Administrasaun Munisipál Covalima, Kampung Baru, sesta ne’e.
Pesoál saúde na’in-46 ne’e kompostu hosi médiku na’in-ida (1), enfermeiru na’in-12, saúde públiku na’in-13, parteira na’in-haat (4), analista na’in-rua (2), motorista na’in-haat (4), farmasia na’in-rua (2), cleaner na’in-hitu (7) ne’ebé sira-nia kontratu ramata ona iha fulan-juñu nia rohan no agora halo ona estensaun ba sira-nia kontratu ho durasaun tempu fulan neen (6).
Ho nune’e, pesoál saúde na’in-46 ne’e, servisu saúde Covalima koloka tuir mapeamentu ne’ebé mak durante ne’e postu saúde sira seidauk iha parteira, infermeira no médiku.
Bazea ba dadus hosi servisu saúde Covalima, postu saúde iha Covalima hamutuk 24 no hosi númeru ne’e postu saúde neen (6) mak seidauk iha médiku hanesan postu saúde Foho Lulik, Lalawa, Gala, Caicoli, Belaku no Kulu-oan.
Enkuantu postu saúde ne’ebé seidauk iha parteira mak hanesan Bulu, Fatuleto, Caicoli, Belaku no Kulu-aon postu saúde Alastehen ho Nanu no seluk tan, maibé servisu saúde rasik buka meiu jere nia rekursu hodi destaka parteira no médiku iha postu saúde hirak ne’e.
Notísia Relevante: Pesoál saúde 46 iha Covalima nia kontratu sei ramata
Jornalista : Celestina Teles
Editór : Cancio Ximenes
