HEADLINE, INKLUZAUN SOSIÁL, NASIONÁL

Hamenus violénsia doméstika, PR konsidera feto tenke iha poder ekonómiku

Hamenus violénsia doméstika, PR konsidera feto tenke iha poder ekonómiku

Prezidente Repúblika, José Ramos Horta. Imajen Tatoli/Antonio Daciparu

DILI, 08 jullu 2022 (TATOLI)—Prezidente Repúblika, José Ramos Horta, hateten, kada nasaun iha kazu ba violénsia doméstika a’as, tanba ne’e solusaun ida ba problema mak feto tenke iha poder ekonómiku.

“Klaru atu dimimui, bainhira justisa maka’as, feto tenke iha poder ekonómiku no tenke iha  asesu ba edukasaun ka estudu boot hodi hetan poder polítiku, ekonómiku, no edukasaun ba kultura no dame,” PR Horta hateten durante diskursu, iha ámbitu komemorasaun loron implementasaun lei kontra violénsia doméstika númeru 7/7 2010 ba dala-XII, iha Palásiu Prezidensiál, Aitarak-laran, sesta ne’e.

Notísia relevante: FOKUPERS no SEII komemora loron implementasaun lei konta violénsia ba dala-XII

Inan-feton sira hamutuk ho esdante hosi UNTL inklui labarik sira, halo marsa pás hosi jardin 5 de maiu to’o Palásiu Prezidensiál, Bairru Pité, hodi komemora loron implementasaun lei konta violénsia doméstika, sesta (08/07). Imajen Tatoli/António Daciparu

Nia dehan, violénsia doméstika bainhira haree ba fenómenu mundiál, iha estudu balun hateten katak akontese tanba problema ekonomia no kultura tanba haree rai-boot sira hanesan Ámérika, Europa, Austrália kazu ne’e eziste ho númeru a’as.

“Presiza sosiedade mós iha estudu edukasaun tanba laiha dalan seluk tenke iha empoderamentu feto, katak feto hetan poder polítiku atu tama mós iha polítika no governasaun. Iha Timor-Leste, vítima violénsia doméstika hasoru feto no labarik feto tanba  laiha poder iha família, tanba ne’e atu kontribui hamenus ba kazu ne’e, dame tenke hahú hosi uma-laran ba feto no labarik sira,” nia akresenta.

Atividade empoderamentu feto

Iha fatin hanesan, Sekretaria Estadu ba Iguladade no Inluzaun (SEII), Maria do Rosário Fatima Correia, hateten, relasiona ho empoderamentu ba feto, daudaun ne’e SEII ajuda ona feto hamutuk 660 atu halo negósiu oioin. 

Inan-feton sira hamutuk ho esdante hosi UNTL inklui labarik sira, halo marsa pás hosi jardin 5 de maiu to’o Palásiu Prezidensiál, Bairru Pité, hodi komemora loron implementasaun lei konta violénsia doméstika, sesta (08/07). Imajen Tatoli/António Daciparu

“Ami iha orsamentu ne’ebé prevee iha transferénsia públika no ita fó ona ba grupu barak iha munisípiu hotu, ba feto hamutuk 660, hetan ona orsamentu rotativa ho valór $2.000 atu halo negósiu oin-oin. Orsamentu rotativa katak, grupu ne’ebé simu osan $2.000 atu halo sira-nia negósiu, bainhira hetan ona lukru, osan sira ne’e haruka fali ba grupu seluk no atividade ne’ebé sira halo mak hanesan fa’an roupa obralan, hakiak manu, kuda modo, no seluk tan,” nia esplika.

Aleinde ne’e, SEII fó apoiu orsamentu $1.000 ba grupu defisiénsia ka vulnerável tebes, ne’ebé hetan violénsia abuzu sexuál no violénsia doméstika, hodi ajuda sira-nia ekonomia uma-laran.

“Osan ne’ebé ita fó apoiu ne’e la rotativa, maibé hela ho sira atubele uza ba negósiu hodi haforsa sira-nia eknómia uma-laran,” nia dehan.

Jornalista   : Arminda Fonseca

Editora       : Julia Chatarina

iklan
iklan

Leave a Reply

iklan
error: Content is protected !!