DEFEZA, HEADLINE

MD no F-FDTL anúnsia rekruta membru foun na’in-600 iha tinan ne’e

MD no F-FDTL anúnsia rekruta membru foun na’in-600 iha tinan ne’e

Ministru Defeza, Filomeno da Paixão de Jesus Akompania husi Tenente Jenerál Falur Rate Laek Halo konferensia imprensa kona-ba rekrutamentu ba membru F-FDTL Foun tinan 2022. Ministériu Defeza, iha Fatuhada, Sexta (08/07). Imajen Tatoli /Egas Cristóvão

DILI, 08 jullu 2021 (TATOLI)— Ministériu Defeza (MD) ho komandu FALINTIL-Forsa Defeza Timor-Leste (F-FDTL), anúnsia ona, iha tinan ne’e (2022), hahú halo rekrutamentu ba membru foun F-FDTL na’in 600.

Iha prosesu rekrutamentu ne’e, MD no F-FDTL sei re-anúnsiu de’it naran kandidatu sira ne’ebé molok ne’e submete ona sira ninia dokumentu, maibé la konsege pasa iha selesaun ho totál ema na’in-1.800.

Prosesu rekrutamentu ne’e ho bazia ba desizaun Governu liuhusi reuniaun Konsellu Ministru, iha loron 04 maiu 2022 kona-bá proposta rekrutamentu ba membru efetivu F-FDTL na’in- 600.

“Tinan ne’e, Ita planeia rekruta tan efetivu ema na’in-600, maibé ita nafatin mantein ho lista anteriór, signifika katak ita kontinua foti de’it sira ne’ebé foin daudaun hatama dokumentu maibé la liu. Ita foti fali sira ne’e, tanba osamentu limitadu,” Ministru Defeza, Filomino Paixão de Jesus, hateten ba Jornalista sira liuhosi konferénsia imprensa iha salaun auditoriál Ministériu Defeza Fatuhada, Dili, sesta ne’e.

Hosi númeru efetivu na’in-600 ne’ebé mak aprova ona nee, sei fahe ba komponente no unidade sira hotu, mak hanesan na’in-240 sei dezloka ba komponente  Navál no na’in-240 ba komponente ba Terestres no na’in-120 ba unidade sira seluk.

“Prosesu rekrutamentu ne’e atu ratifika de’it dokumentu aplikante sira ne’ebé mak  iha prosesu e selesaun iha tinan 2021 hamutuk  ema na’in 1.800,” nia afirma.

Nune’e, Nia dehan Komisaun Rekrutamentu halo ona filtrazen ba ema sira ne’e no sei ba taka naran iha kada munisipiu iha semana oin.

Rekrutamentu ba iha tinan 2022 ne’e sei foku idade minimu 18 no másimu 25 inklui aplikante sira mós tenke sidadaun orjinál Timor-Leste.

Iha biban hanesan, Xefe Estadu Maiór Jenerál F-FDTL, Tenente Jenerál Falur Rate Laek, husu ba  joven sira ne’ebé tama iha forsa armada tenke kumpre regra militár  la’ós tama tiha forsa maka  halai sai fali.

“Ita bo’ot mai iha militár ne’e, la’ós halimar maibé mai atu eduka no treinu atu sai militár. Husu ba joven sira tenke hatudu espíritu prontidadaun tama militár atu serbí Estadu no povu,”  Falur Rate Laek sujere.

Iha fatin hanesan, Diretór Jerál Administrasaun Finansa Ministériu Defeza, Nuno de Carvalho, informa rekrutamentu ne’e sei re-anúnsia de’it lista ka naran ne’ebé iha tinan kotuk submete ona.

“Lista ida ne’e, ami filtra husi dadus sira ne’ebé mak uluk ne’e, liuliu sira ne’ebé foin daudaun kokore, maibé la konsege ba iha Metinaro, ne’e mak ita filtra fali no kontinua ba iha tinan 2022,” nia akresenta.

Kona-bá kritériu rekrutamentu, nia dehan mantein nafatin kritériu ida uluk no sei la muda kritéria liuliu sei la fó biban ba joven sira ne’ebé mak tuir arte marsiál. Maibé hakarak sai forsa tenke prense deklarasaun.

“Ami halo fitra ba númeru ne’e no ami sei la foti iha área seluk, nune’e sira ne’ebé mak iha lista ida uluk idade 25 ho 26, maibé agora mak tama ona ba idade 26 ho 27, ami sei la konsidera ona,” nia hateten.

Rekrutamentu ida ne’e mós institusaun F-FDTL fó nafatin importansia ba feto atu tama F-FDTL ho 30% ba feto.

Orsamentu ba prosesu rekrutamentu ne’e, hamutuk $500,000-resin. Enkuantu rekrutamentu ida-ne’e Governu ho Komandu F-FDTL deside fó prioridade bá veteranu nia oan sira ne’ebé uluk sakrifika aan durante prosesu luta bá libertasaun nasionál TL.

Jornalista: Natalino Costa

Editór       : Florencio Miranda Ximenes

iklan
iklan

Leave a Reply

iklan
error: Content is protected !!