iklan

EDUKASAUN, HEADLINE

MEJD planeia integra matéria mudansa klimátika ba kurríkulu eskolár

MEJD planeia integra matéria mudansa klimátika ba kurríkulu eskolár

Plan internasionál hala'o enkontru apresiasaun ba parseiru nasionál no internasionál kona-ba implementasaun programa ‘adaptasaun mudansa klimátik, iha salaun JL Vila, sesta (08/07). Imajen Tatoli/Francisco Sony

DILI, 08 jullu 2022 (TATOLI)—Organizasaun dezenvolvimentu no umanitária, Plan international, foin termina formasaun kurríkulu mudansa klimátika ba profesór na’in-80 iha munisípiu Ainaro no Aileu.

Ministru Edukasaun Joventude no Desportu, Armindo Maia. Imajen Tatoli/Francisco Sony

Ministru Edukasaun Juventude no Desportu (MEJD), Armindo Maia, hateten, formasaun ne’ebé Plan Internasionál realiza ba profesór sira iha munisípiu rua, ho intensaun atu integra matéria alterasaun klimátika no meiu ambiente iha kurríkulu eskolár Timor-Leste.

“Ita iha ona revizaun ba kurríkulu no daudaun ne’e ita serbisu hamutuk ho Sekretaria Estadu Ambiente no Protesaun Sivíl, inklui la’o hamutuk ho Plan Internasionál no ONG Raibya atu ajuda ita-nia estudante sira hodi hetan konsiénsia no koñesimentu kona-ba meiu ambiente, dezastre naturál no alterasaun klimátika,” Ministru dehan iha Otél JL Vila, Fatumeta, sesta ne’e.

Ho formasaun ne’e, profesór sira bele habelar koñesimentu estudante sira kona-ba mudansa klimátika no dezastre naturál, nune’e bele muda mentalidade estudante sai autór atu proteje ambiente iha nasaun ne’e.

Notísia relevante: Workshop: UE apoiu $833.000,00 hasa’e koñesimentu kona-ba mudansa klimátika

Governante ne’e konsidera, profesór sira presiza hetan informasaun barak hodi bele disemina fali informasaun ba estudante, tanba profesór mak sai xave importante atu ajuda halo mudansa boot ba mentalidade estudante sira.

“Profesór 80 ne’ebé ramata ona formasaun ne’e, atu kontinua hatutan fali informasaun sira ne’e ba profesór inklui estudante iha eskola sira atu sira bele hetan koñesimentu di’ak liután kona-ba mudansa klimátika inklui impaktu sira,” nia tenik.

Aleinde ne’e, daudaun ne’e Ministériu Edukasaun Juventude no Desportu (MEJD) rejista totál estudante no profesór hamutuk 450.000 mak eziste iha Timor.

“Espera liuhosi programa ne’e konsege muda mentalidade no komportamentu profesór no estudante sira, nune’e bele iha mudansa boot ba rai ida-ne’e,” nia tenik.

Jornalista   : Tomé Amado

Editora        : Julia Chatarina

iklan
iklan

Leave a Reply

iklan
error: Content is protected !!