VIQUEQUE, 08 jullu 2022 (TATOLI)–Ministra Saúde (MS), Odete Belo, iha sesta ne’e, inaugura sentru Kuidadu Emerjénsia Obstériku no Neonatal-Báziku (KemON-B) maternidade, hodi fó atendementu ba inan isin-rua sira no fatin seguru ba violénsia jéneru iha munisípiu Viqueque.
“Konstrui ona sentru KemON-B no fatin seguru iha munisípiu Viqueque tanba ita hatene katak taxa mortalidade materna ba inan iha ita-nia Timor-Leste hatudu redusaun iha tinan barak nian laran, maibé dadus demografia iha tinan 2016 hatudu númeru 1.615, kompara ho antes ne’e 1.100, iha labarik no inan mate. Númeru ida-ne’e konsidera a’as kompara ho nasaun sira seluk iha nasaun sudeste aziátiku,” Ministra Saúde, hateten liuhosi ninia diskursu iha serimónia inaugurasaun KemON-B, iha ospitál internamentu, Viqueque vila, sesta ne’e.
Notísia relevante: Prevene kaben sedu, MS inaugura sentru amigavel saúde ba joven adolexente
Governu Timor Leste iha kompromisu atu hatun mortalidade inan no oan, hanesan reflete ona iha planu nasionál dezenvolvimentu no planu estratéjiku nasionál setór saúde 2011 to’o 2030.
“Ita hotu hatene katak iha asuntu seluk ne’ebé ita mós ko’alia kona-ba violénsia bazeia ba jéneru, sai ona hanesan asuntu problema saúde públika, kontinua sai violénsia komún ba problema direitu umanu iha nasaun Timor-Leste,” nia akresenta.
Nia dehan, violénsia kontra feto no labarik feto, sira tuir peskiza demográfika saúde Timor-Leste iha tinan 2016, hatudu katak 33% hosi feto sira ho idade 15 to’o 46 sofre asaltu fíziku bainhira sira sei idade 15.
“Ida-ne’e hanesan kazu ne’ebé sériu no presiza ita hotu ninia atensaun no serbisu maka’as, partikularmente setór saúde ninia intervensaun atu responde ba violénsia bazeia ba jéneiru tanba setór saúde sai pontu dahuluk ba kontaktu bainhira hasoru kazu violénsia bazeia ba jéneru,” Ministra tenik.
Nune’e, nia husu parte hotu atu serbisu hamutuk, ho objetivu hatun mortalidade no morbilidade inan, inklui hapara violénsia kontra feto no labarik iha nasaun Timor-Leste.
Iha biban hanesan, Administradór munisípiu Viqueque, Januário Soares ‘Bolly’, nota katak Governu liuhosi Ministériu Saúde tau-atensaun maka’as ba setór saúde hodi kria fasilidade KemON-B hodi hasa’e kualidade atendimentu ba inan sira iha munisípiu Viqueque.
“Agradese mós ba profesionál saúde sira iha munisípiu Viqueque,” Autoridade munisipál ne’e hato’o.
Nune’e mós, Diretór Servisu Saúde munisípiu Viqueque, Francisco de Carvalho, hateten, fasilidade ne’e harii ho objetivu atu hasa’e kualidade atendimentu ba inan durante isin-rua to’o partu inklui ba bebé foin moris iha munisípiu ne’e.
“Kualidade ida-ne’e hatudu liuhosi disponbilidade servisu atendimentu obstrítika no partu ba inan iha sentru KemON-B, ne’ebé iha profesionál na’in-lima treinadu no kualifikasaun a’as bele fó atendimentu ba ita-nia komunidade durante 24 oras,” nia tenik.
Fasilidade ne’e hahú konstrusaun iha janeiru, ne’ebé hetan apoiu orsamentu hosi Uniaun Europeia ho montante hamutuk $24.388,64.
Serimónia ne’e partisipa hosi Deputadu sira hosi Komisaun F ne’ebé trata asuntu Saude, Seguransa Sosial no mos Igualdade Jéneru, Administradór munisípiu Viqueque, Administradór postu lima, Xefe suku sira inklui organizasaun internasionál United Nations Fund for Population Activities (UNFPA) no United Nations International Children’s Emergency Fund (UNICEF).
Jornalista : Vitorino Lopes da Costa
Editora : Julia Chatarina
