ETO Telco sei transmite direta kopa mundiál iha Qatar

DILI, 08 jullu 2022 (TATOLI)–Empreza ETO Telco hetan direitu absoluta hodi transmite direta jogu kopa mundiál 2022 ne’ebé realiza iha Qatar 2022, atu populasaun iha territóriu nasionál bele akompaña.
ETO Telco halo transmisaun direta tanba sai manán na’in ba konkursu direitu eskluzivu ofisiál broadcasting kopa mundiál Qatar 2022 iha Timor-Leste.
“ETO Telco mak sei halo transmisaun direta ba totál jogu hamutuk 64, ne’ebé sei asiste liuhosi kanál mak hanesan, ETO+ no kanál ETO sport ba jogu ne’ebé hala’o iha oras hanesan,” Responsavél Programasaun ETO Telco, Jesuina Gusmão, liuhosi konferénsia imprensa ne’ebé hala’o iha edifisiu ETO-Aimutin, sesta ne’e.

Transmisaun direta sei transmite liuhosi plataforma hanesan, ho direitu eskluzivu free to air ka la selu liuhosi kanál no frekuénsia UHF ho kobertura ba Munisípiu 12 inklui Rejiaun Administrativu Espesiál Óe-cusse no Ambeno (RAEOA).
Alende ne’e, iha mós direitu eskluzivu iha televizaun pur asinatura ou play TV ka prepagu liuhosi transmisaun dijitál territoriál ho receiver ETO Telco, espesial ba Munisipiu Dili, direitu eskluzivu internet streaming liuhosi plataforma TV-Timor ba territóriu Timor-Leste.
Transmisaun ne’ebé ETO halo hetan mós suporta másimu hosi patrosinadór Gota Timor-Leste, empreza bebida ne’ebé ho kualidade di’ak iha Timor-Leste.
“Mai ita valoriza ita nia TV lokál hanesan ita nia kanál favoritu liuhosi ita nia empreza ETO Telco,” dehan Jesuina.
Iha fatin hanesan, Jerente Gota, Mario Martinho da Silva, hateten sente orgullu bele sai patrosinadór ba ETO hodi suporta transmisaun direta ba kopa mundial ne’ebé sei hala’o iha novembru tinan ne’e.
“Ami orgullu bele sai patrosinadór ba transmisaun kopa mundial, ami sai patrosinadór tanba hakarak hamutuk hodi bele fó sai jogu mundiál ne’e ba ita nia populasaun iha territóriu nasionál hotu bele asiste direta,” nia dehan.
Gota hanesan produtu bee ne’ebé ho kualidade di’ak atu apoiu desportu hotu iha Timor–Leste atu anima komunidade sira hotu.
Entretantu, jerente ETO Telco, Edmundo Freitas Lopes, hatutan folin ne’ebé ETO manán iha konkursu Federation International Football Assosiation (FIFA) sei labele fó sai no konsidera konfidensiál ba ETO.
“Koba-bá presu ne’ebé ami manán iha konkursu FIFA nian ami labele fó sai tanba konfidensiál ami nian, se ami fó sai ne’e bele fó impaktu ba ami nia konkursu sira tuir mai ne’e,” Edmundo dehan.
Nia dehan, ho transmisaun ne’ebé ETO atu fó sai ne’e sei iha kualidade ne’ebé di’ak ba hare na’in futeból sira hotu iha Timor–Leste.
Jogu ba kopa mundial sei hala’o iha Qatar hahú iha 21 novembru to’o 18 dezembru tinan ne’e.
Nasaun hamutuk 31 iha mundu mak sei partisipa iha kopa mundial ne’e fahe ba grupu ualu hosi A-H no grupu A mak hanesan, Qatar, Ecuador, Senegal, Netherlands.
Grupu B, Inglaterra, Iran, Estadu Unidu America (EUA) no Wales. Grupu C mak hanesan, Argentina, Saudi-Arabia, Mexico no Polandia.
Grupu D mak hanesan, Fransa, Austrália, Denmark no Tunisia. Grupu E mak hanesan, España, Costarika, Jerman no Japaun.
Grupu F mak hanesan, Belgia, Canada, Marocco no Croasia. Grupu G mak hanesan, Brazil, Serebia, Switzerland no Cameroon. Grupu H mak hanesan, Portugal, Ghana, Uruguay no Korea Súl.
Jornalista: Hortencio Sanchez
Editór : Florencio Miranda Ximenes

