DILI, 08 jullu 2022 (TATOLI)–Timor-Leste sauda no apresia desizaun Governu Austrália liuhosi Prokuradór-Jerál australianu, Mark Dreyfus, ne’ebé retira ona akuzasaun hasoru Bernard Collaery, iha loron kinta (07/07).
Advogadu australianu, Bernard Collaery, hetan akuzasaun iha tinan-haat liubá tanba divulga informasaun konfidensiál kona-ba suporta operasaun espionajen Austrália iha Timor-Leste.
“Prokuradór-Jerál, Mark Dreyfus QC MP, hato’o iha anúnsiu desizaun ne’e katak tau iha konsiderasaun kompromisu atu proteje interese nasionál Austrália, inklui seguransa nasionál no relasaun Austrália ho ninia viziñu besik sira,” refere nota imprensa ne’ebé Agência Tatoli asesu, sesta ne’e.
Notísia relevante: Xanana agradese Governu Austrália retira akuzasaun hasoru Bernard Collaery
Governu Timor-Leste rekoñese no agradese kontribuisaun Bernard Collaery no ninia kliente, ne’ebé hanesan eis-espiaun ida koñesidu hanesan testemuña K, iha prosesu ne’ebé permite ona atu estabelese fronteira marítima definitiva sira entre Timor-Leste ho Austrália iha Tasi Timor, ne’ebé atinje ona ho asinatura tratadu entre país rua ne’e iha loron 06 marsu 2018.
Timor-Leste selebra no rekoñese mós kontribuisaun povu australianu, ne’ebé durante ne’e apoia no kontribui ona hodi taka akuzasaun ida-ne’e no hodi alkansa akordu delimitasaun fronteira marítima ho Austrália.
Portavós Governu no Ministru Prezidénsia Konsellu Ministru, Fidelis Manuel Leite Magalhães, lori Konsellu Ministru no Governu tomak nia naran, hato’o parabéns ba Governu australianu nia desizaun ne’ebé justa no afirma katak korresaun ba erru ne’ebé uluk komete ona sei kontribui atu hakle’an liután relasaun amizade entre país viziñu rua ne’e.
VIII Governu Konstitusionál, ne’ebé lidera hosi Primeiru-Ministru, Taur Matan Ruak, komprometidu atu harii futuru prósperu, ne’ebé Austrália sai hanesan parseiru ne’ebé labele substitui.
Jornalista : Antónia Gusmão
Editora : Julia Chatarina
