EKONOMIA, ERMERA, HEADLINE, MUNISÍPIU

Governu planeia define folin kafé

Governu planeia define folin kafé

Kafé Ermera. Imajen Tatoli/António Gonçalves

ERMERA, 09 jullu 2022 (TATOLI)–Prezidente Repúblika (PR), José Ramos Horta, hamutuk ho Primeiru-Ministru, Taur Matan Ruak, realiza diálogu komunitáriu iha Gleno, munisípiu Ermera, sábadu ne’e.

Biban ne’e, PM Taur hateten, Governu planeia hela hodi kria mekanizmu define folin kafé iha Timor-Leste, nune’e bele fó rendimentu di’ak ba produtór kafé.

“Haree ba produsaun kafé menus no presu kiik tebes, maka Governu sei tuur hamutuk ho asosiasaun agrikultór produsaun kafé no setór privadu hodi deskute presu kafé, tanba ita hakarak define kadeia valór no iha kadeia valór rasik, tanba ita-nia hakarak oinsá kafé nia folin di’ak. Hodi hetan folin di’ak só nia tama iha sistema kadeia valór, oinsá atu halo produsaun, sertifikasaun to’o exportasaun,” PM dehan iha Gleno.

Notísia relevante: SEA no MAP asina akordu revitalizasaun no espansaun kafé

Xefe Governu nota mós katak, iha Japaun no nasaun seluk, kafé Timor sikra ida bele to’o $9, tanba ne’e presiza define presu, nune’e bele fó satizfasaun ba komunidade.

“Iha tempu badak ami hakarak serbisu ho asosiasaun produtór kafé, setór privadu, no emprezáriu sira ne’ebé investe ba kafé hodi diskute estratejia dezenvolve kafé, hahú hosi kuda  to’o iha sikra,” nia akresenta.

Haree ba potensialidade kafé iha rai-li’ur, Xefe Governu iha tempu badak sei nomea Sekretáriu Estadu asuntu exteriór, hodi nune’e bele halo promosaun ba kafé iha diáspora.

“Ha’u sei haruka proposta ba Prezidente Repúblika atu nomea Sekretáriu Estadu ne’ebé tau-matan ba komunidade Timor-Leste iha diáspora, nune’e ita bele halo promosaun ba kafé iha rai-li’ur,” nia tenik.

Maski nune’e, tuir Xefe Governu, presiza halo reabilitasaun kafé tanba númeru plantasaun kafé hahú tun no kafé agora ninia hun hahú tuan ona.

“Uluk ita iha kafé ektare 72.000, maibé agora ita-nia produtividade tun ona ba ektare 52.000, ne’ebé benefisia ba família 300.000, signifika ita iha kafé ne’ebé boot no barak, maibé ninia produtividade menus. Entaun tinan ne’e Governu komesa halo intervensaun ba iha produsaun kafé ho Orsamentu Retifikativu 2022, ne’ebé Governu tau millaun $6,4 hodi ajuda ita-boot sira reabilita plantasaun ektare 10.400, korresponde ba 20% kafé ne’ebé ita-boot sira iha,” nia informa.

Iha sorin seluk, Governu sei analiza ideia hosi Prezidente Repúblika, ne’ebé husu atu kria fundu ba kafé lokál, nune’e bele fó benefísiu ba produtór kafé no ajuda eleva ekonomia família no nasaun nian.

“Prezidente Republika lansa ideia ida kona-ba kria fundu ba kafé. Governu bele estuda no koordena ho Prezidente Repúblika no destintu Deputadu sira iha Parlamentu Nasionál, nune’e bele haree dalan halo nusa maka bele ajuda, hadia, no aumenta produtividade kafé nian,” PM salienta.

Jornalista   : Natalino Costa

Editora       : Julia Chatarina

iklan
iklan

Leave a Reply

iklan
error: Content is protected !!