ERMERA, MUNISÍPIU, POLÍTIKA

PR Horta husu povu TL hadomi kafé nu’udar kultura nasionál

PR Horta husu povu TL hadomi kafé nu’udar kultura nasionál

Plantasaun Kafé iha Munsípiu Ainaro, domingu (15/05). Imajen Tatoli/Francisco Sony

ERMERA, 09 jullu 2022 (TATOLI)—Prezidente Repúblika (PR), José Ramos Horta, sábadu ne’e, hala’o diálogu komunitáriu ho komunidade iha postu administrative Gleno, munisípiu Ermera ho tema kultura “Dalan ba Dame”.

Atividade diálogu ne’e organiza hosi Prezidénsia Repúblika ne’ebé partisipa mós hosi órgaun soberania seluk hanesan Xefe Governu, Prezidente Parlamentu Nasionál no Prezidente Tribunál Rekursu.

PR Horta hateten, ohin loron ida espesiál hamutuk ho orgaun soberánia hotu-hotu, autoridade militár, kolabaradór partidu polítiku hotu, autoridade munisípál, komunidade Ermera, no entidade oioin iha ne’e.

“Liafuan di’akliu ha’u hakarak ko’alia iha ne’e kona-ba kultura kafé, saida mak ha’u hakarak ita povu Timor-Leste hadomi kafé hanesan kultura nasionál, hodi kuda kafé iha fatin sira-ne’ebé kafé iha no tenke halo tratamentu ne’ebé di’ak,” PR Horta hateten iha nia intervensaun durante diálogu komunitáriu, iha Gleno Villa, sábadu ne’e.

PR hakarak povu Timor-Leste hadomi kafé hanesan kultura nasionál, proteje tau matan didi’ak  hodi fó moris ba komunidade lubuk, mezmu durante ne’e Governu hanoin to’o  agora iha ona planu aumenta produsaun kafé.

“Governu iha planu no halo estudu tinan hirak ne’e, nune’e la presiza estudu tan dezde tinan 20 mai entaun ha’u-nia mehi ita mobiliza nasaun tomak iha fatin ne’ebé kafé bele kuda, tratamentu espesiál ho di’ak,” nia dehan.

Tanba ne’e, Xefe Estadu konvida parte hotu hahú hosi Governu,  líder universidade kafe Ermera, produtór kafé boot hanesan Kooperativa Kafé Timor (CCT, siglá portugés), agrikultór sira no populasaun tomak  tinan barak mai atu tau matan servisu hamutuk mobiliza rekursu no tékniku sira kuda kafé iha fatin-fatin.

“Agora ita prodús kafé to’o rihun 50 tonelada, iklima ne’ebé di’ak maibé tenke tau matán didi’ak ba kafé ita hakarak aumenta to’o rihun 300 no iha tinan 20 mai tan hakarak bele produsaun aumenta ba rihun 500 kada tinan, nune’e Timor-Leste bele sai produtór mundiál,” nia sujere.

Xefe Estadu prefere Governu presiza hasai osan hosi fundu mina-rai hodi kria fundu kafé hodi dezenvolve liután setór ne’e, liuhosi kria fundu kafé bele hasai osan hosi fundu petróliu hodi kria, tanba durante ne’e fundu petróloiu halo investimentu rai-laran liuhosi Orsamentu Jerál Estadu kada tinan.

“Agora oinsá mak kria fundu kafé mai hosi fundu osan mina-rai,” nia hateten.

Fundu kafé ne’e oinsa hodi dezenvolve aumenta produsaun kafé no proteje mós folin kafé, tanba  folin kafé mundiál tun-sa’e labele kontrola, nune’e fundu kafé ne’e oinsá proteje  produtór-na’in sira liu-liu povu agrikultór.

“Fundu kafe estratéjia oinsá ha’u la esplika detallu, maibé fundu ne’e liuhosi intervensaun Governu nian, impaktu instrumentu finanseiru fó protesaun kafé no produtór. Nune’e, oinsá dezenvolve liután setór kafé hanesan iha Ermera ne’ebé ponténsia inklui munisípiu seluk ne’ebé iha tanba bainhira atinje to’o produsaun tonelada rihun 500 ne’ebé ita hanoin, bele fó empregu ba joven sira-ne’ebé daudaun laiha empregu, nune’e hanesan rikeza ba joven dezempregu.

PR Horta apela, timor-oan tomak hamutuk hadomi kafé nu’udar kultura identidade nasionál, nune’e hahú hosi Estadu no komunidade mobiliza kuda kafé no tratamentu kafé, hodi iha tempu oin mai sai produtór mundiál, aleinde sei atrativu ba merkadu turizmu hodi halo didi’ak no dada vizitante estranjeiru.

“Portantu ha’u-nia vizaun liuhosi kafé haree ekonómia kore an ba mina no gas, ita ko’alia beibeik diversifikasaun ekonomia,” nia dehan.

Prezidente Autoridade Munisípiu Ermera, Eusebio Salsinha,  lori autoridade munisípál no povu Ermera hato’o bem-vindu Xefe Estadu ne’ebé akonpaña mós lidér órgaun soberania seluk hodi marka iha eventu diálogu ho tema dalan ba dame.

“Sente previléjiu hamutuk ho povu Ermera espresa rekuñesimentu halo nafatin esforsu tulun povu iha situasaun mukit,” nia hateten.

Agrikultór Kafe iha Ermera, Alberto Martins ho Crisanto Carmo, apresia ba Xefe Estadu nia hanoin oinsá servisu hamutuk ho Governu buka meiu oinsá atu bele tau matan ba reflorestasaun Kafé iha Ermera no deteramina folin kafé ne’ebé durante ne’e sai preokupasaun.

Entertantu partisipa iha diálogu ne’e, Primeiru-Ministru (PM), Taur Matan Ruak, Prezidente Parlamentu Nasionál, Aniceto Longuinhos Guterres Lopes, reprezentante Tribunál Rekursu, membru VIII Governu Konstitusionál, emprezáriu, korpu diplomátiku, entidade relevante, autoridade munisipál, autoridade postu, komunidade Ermera ho konvidadu sira seluk.

Jornalista : Nelson de Sousa

Editór       : Cancio Ximenes

iklan
iklan

Leave a Reply

iklan
error: Content is protected !!