iklan

EKONOMIA, HEADLINE

Veteranu Manufahi forma grupu hodi hakiak animál

Veteranu Manufahi forma grupu hodi hakiak animál

Tanki Hakiak Ikan. Imajen/ Tatoli Egas Cristovao

DILI, 09 jullu 2022 (TATOLI)–Prezidente Konsellu Veteranu munisípiu Manufahi, Tobias Amaral Magno ‘Maksakur’, hateten, veteranu ho grau 0,3 no 4,7, hahú forma ona grupu hodi hakiak animál.

“Objetivu forma grupu atu halo planu hakiak animál no halo to’os tanba iha kombatente balun la hetan direitu ba pensaun kada fulan, enkuantu kombatente ho grau 8,14,15,19 ne’e hetan ona pensaun kada fulan, nune’e apoiu ne’e sei fó de’it ba hirak ne’ebé la hetan pensaun,” Maksakur informa ba Agência Tatoli, via telefónika, sábadu ne’e.

Notísia relevante: Konsellu Veteranu finaliza ona verifika dadus veteranu rejistadu 2009 iha Beco

Grupu sei fahe ba sia, kompostu hosi grupu lima hosi Same, rua hosi Fatuberlio no rua hosi Turiscai, ne’ebé kada grupu mínimu iha ema na’in-lima.

Intensaun forma grupu mós tanba kombatente sira-nia grau la hanesan no sira ne’ebé espesífiku atu hetan apoiu ne’e ho grau 0,3 ho 4,7.

Inisiativa ne’e hosi Servisu Apoiu Sosiedade Sivil no Auditoria Sosiál (SASCA) hamutuk ho Konsellu Kombatente Libertasaun Nasionál (CCLN, sigla portugés), ne’ebé foin planu maibé fahe ona ba grupu sia, nune’e tinan ne’e mak foin realiza programa ne’e.

“Atividade ne’ebé sei halo mak hanesan hakiak manu, fahi, karau, ikan no halo to’os. Maibé ita iha ne’e tempu limitadu, entaun grupu ida mak hakarak hakiak ikan no grupu seluk hanoin hakiak karau hotu,” nia tenik.

Tuir Prezidente Konsellu Veteranu, grupu veteranu grau 0-3 ho 4-7 sira sei fahe osan hanesan hosi totál orsamentu $20.000.

“Ami hetan apoiu hosi CCLN liuhosi SASCA ba ita-nia maluk kombatente libertasaun sira hodi buka moris, nune’e semana oin reprezentante na’in-rua sei bá nasionál hodi asina akordu, nune’e bele simu osan no implementa ona programa,” nia salienta.

Prezidente Konsellu Veteranu munisípiu Manufahi rekomenda ba Governu liuhosi CCLN atu kontinua programa ne’e to’o kombatente ho grau 0,3 ho 4,7 hetan apoiu hodi buka moris no bele sustenta família rasik.

“Ita mós prepara grupu, nune’e labele monu iha dalan klaran no labele impede fali ema seluk ne’ebé hanoin atu forma grupu hanesan ho sira. ida-ne’e hanesan oportunidade ida, maibé tenke uza ho di’ak nune’e bele fó benefísiu ba imi no ba família sira,” nia fó hanoin.

Biban ne’e, nia agradese ba SASCA ne’ebé koordena hamutuk ho CCLN hodi realiza programa ne’e hodi apoiu veteranu sira bele sustenta sira-nia moris, liu-liu haree oan sira-nia estudu.

Jornalista   : Osória Marques

Editora       : Julia Chatarina

iklan
iklan

One Comment

Leave a Reply

iklan
error: Content is protected !!