DILI, 10 jullu 2022 (TATOLI)—Partidu Demokrátiku (PD), domingu ne’e realiza kofrerénsia nasionál ba-IV ho tema “Hamutuk Iha Mehi, Hamutuk Hodi Serví”.
Sekretáriu Jerál PD, António da Conceição ‘Kalohan’ hateten, koferénsia ohin, nu’udár konferénsia nasionál da-ruak ba tinan 2022, hodi halo reflesaun ba lala’ok Partidu Demokrátiku nian hodi kumpri bá misaun PD nian.
“Eventu ida ohin mós atu ita hotu hamutuk iha mehi partidu nian atu tau ita-nia hanoin, halo avaliasaun atu koñese saida mak ita-nia dezafiu no problema hodi hadi’a prepara-aan ba eleisaun 2023,” António da Conceição “Kalohan”, hateten, iha salaun Delta Nova, Dili.
Nia dehan, PD realiza koferénsia nasionál tanba atu afirma PD nia fraternidade ba eleisaun 2023, tanba konferénsia ne’e atu kompromisu hatudu katak bainhira estrutura ida tenke servisu ba tinan lima sukat ho eleisaun, tanba eleisaun mak sukat progresu serbisu.
Nune’e konferénsia ohin ne’e mós PD selebra aniversáriu ezisténsia PD nian ba dala-21 ne’ebé monu iha loron 10 juñu 2022.
“Ha’u husu ba ita hotu liuliu militante PD nian ho ezisténsia tinan 21 mai ita hamutuk prepara-aan hodi hasoru eleisaun parlamentár iha 2023,” nia dehan.
Iha vida polítika hanoin bele la hanesan maibé iha objetivu ida de’it hotu-hotu luta ba povu nia moris di’ak.
Líder polítiku ne’ebé partisipa iha konferénsia nasionál ne’e mak hanesan, Prezidente Repúblika, José Manuel Ramos Horta, Sekretáriu Jerál Partidu CNRT, Francisco Calbuadi Lay no militante PD nian. Iha konferénsia ne’e partisipa mós Prezidente Komisaun Nasionál Eleisaun (CNE, sigla portugués), José Belo.
Iha fatin hanesan, Sekretáriu Jerál Partidu CNRT, Francisco Calbuadi Lay, konsisera PD nu’udar parseiru polítiku ne’ebé di’ak tebes, tanba ezemplu hatudu ona eleisaun prezidensiál ronde daruak.
“Tanba ne’e ha’u husu imi tane nafatin fiar ne’ebé iha hanesan ita lori ona ita-nia maun José Manuel Ramos Horta sai ona Prezidente Repúblika, fiar ne’e mai hosi mós povu nune’e ba oin ita serbisu hamutuk la’os ita de’it maibé Governu hotu serbisu ba nasaun ida-ne’e di’ak,” nia dehan.
Jornalista : Arminda Fonseca
Editór : Evaristo Soares Martins
