2023, MS planu konstrui postu saúde 25 iha territóriu nasionál
DILI, 11 jullu 2022 (TATOLI)— Diretór Jerál Servisu Koorporativu iha Ministériu Saúde (MS), Marcelo Amaral, informa MS iha planu atu konstrui tan Postu Saúde hamutuk 25 iha territóriu nasionál hodi fasilita komunidade sira asesu saúde ho di’ak.
“Ami nia planu hakarak konstrui postu saúde hamutuk 25 atu kompleta tanba sei falta postu saúde no rezidénsia médika hamutuk 135. Ha’u hanoin presiza aseleira oituan atu ita-nia komunidade sira iha área rurál bele asesu ba iha servisu saúde di’ak,” Diretór Jerál ne’e hateten ba Agência TATOLI iha MS-Caicoli, segunda ne’e.
Maske, nia dehan MS iha planu konstrui tan postu saúde iha teritoiriu nasionál, maibé depende ba planu fiskál ne’ebé mak Ministériu Saúde hetan.
Tanba, iha Planu Grande Opsaun ne’ebé mak hato’o ba Governu liuhosi Ministériu Finansas atu konsolida bainhira kompleta postu saúde sira ne’ebé mak seidauk konstrui iha área rurál sira.
“Tinan ida ne’e, ita la konsegue konstrui tanba orsamentu ne’ebé mak aloka ne’e kuaze ita selu hotu divida infraestrutura tinan 2021 ho valór millaun $1.7 tanba konstrusaun la’o tarde. Maibé ami tenke hadia jestaun ida ne’e, atu labele lori divida ba tinan tuir mai,” nia kompromete.
Hahú tinan 2019 to’o 2022, Minsitériu Saúde konsege konstrui fasilidade saúde iha territóriu nasionál, ne’ebé finansia hosi fundu Orsamentu Jerál Estadu (OJE) no ajuda hosi parseiru internasionál no fundu COVID-19 hamutuk 639.
Hosi totál fasilidade saúde 639, kompostu hosi Sentru Saúde hamutuk 71, postu saúde 325, Maternidade 50, Mini Maternidade hamutuk tolu, mini laboratóriu 12, rezidénsia médiku 156, Izolamentu COVID-19 hamutuk 12 no Laboratóriu COVID-19 hamutuk 10.
Konstrui fasilidade saúde ne’e ho bazeia ba Objetivu Dezenvolvimentu Sustentavel (ODS) 2011 to’o 2030, ne’ebé VIII Governu Konstitusionál iha komprimisiu dezenvolve programa saúde iha família liuhosi dezenvolve área infraestrutura bázika no rekursu umanu hodi presta servisu di’ak liután ba populasaun liuliu hakbesik saúde ba komunidade.
Nune’e, Governu kada tinan prioritiza setór saúde liuliu foku ba infraestrutura hosi destaka profisionál saúde ba kada postu saúde sira iha área rurál bele hafasil komunidade hetan tratamentu saúde.
Notísia relevante: 2019 to’o 2022, MS konstrui fasilidade saúde 639 iha territóriu nasionál
Jornalista : Felicidade Ximenes
Editór : Florencio Miranda Ximenes
