iklan

HEADLINE, MUNISÍPIU, OÉ-CUSSE (RAEOA), POLÍTIKA

CNE abertura edukasaun sívika ba eleitór Pássabe hasoru eleisaun parlamentár

CNE abertura edukasaun sívika ba eleitór Pássabe hasoru eleisaun parlamentár

Diretór CNE RAEOA, Tomás Oqui Meta. Imajen Tatoli/Abílio Elo Nini.

OÉ-CUSSE, 11 jullu 2022 (TATOLI) – Komisaun Nasionál Eleisaun (CNE, sigla portugés), abertura sensibilizasaun edukasaun sívika ba eleitór sira iha suku Abani no Malelat, sub-rejiaun Pássabe, Rejiaun Administrativa Espesiál Oé-Cusse Ambeno (RAEOA) hodi prepara ba eleisaun parlamentár 2023.

Abertura sensibilizasaun ne’e konsentra iha suku Malelat, ne’ebé lidera hosi Prezidente CNE, José da Costa Belo, akompaña hosi Sekretáriu Rejionál ba Asuntu Administrasaun no Estatál, Martinho Abani Elu, ho tema, “Promove esklaresementu ba sidadaun sira kona-ba aktu eleitorál”.

Diretór CNE Oé-Cusse, Tomás Oqui Meta, informa, sensibilizasaun ne’e importante atu enkoraja eleitór sira atu iha koñesimentu bele partisipa iha prosesu resenseamentu eleitórál, nune’e bele partisipa másimu iha eleisaun parlamentár 2023.

“Tinan ne’e Governu eskolla Oé-Cusse hanesan rai ikun hodi loke edukasaun sívika, iha sensibilizasaun ne’e Prezidente CNE orgullu tanba inan-man sira ultrapasa ona eleisaun Presidensiál la’o ho susesu, tan ne’e ne’e presija halo resenseamentu eleitorál, kaundu inan-aman sira-nia kartaun eleitorál lakon, ka tohár, persiza atu hadia nune’e iha tempu eleisaun ema hotu persiza ezerse direitu idak-idak,” Tomas Oqui Meta, ko’alia iha Oé-Cusse, segunda ne’e.

Nia informa, iha biban ne’e parte CNE hamutuk ho autoridade RAEOA fó atensaun ba autoridade komunitáriu sira iha Pássabe, koordena nafatin ho komunidade iha baze atu fó aviza ba sira-ne’ebé persiza hadi’a ka halo foun ba sidadaun tinan 17 ba leten.

“Iha sesta ne’e ita hahú abertura ona, entaun hahú agora ba oin ita sei kontinua sensibiliza ba komunidade sira iha sub-rejiaun seluk sei tama to’o suku aldeia sira, atu fó hanoin nafatin, katak nu’udar sidadaun Timor-Leste iha obrigasaun atu hili nai ulun sira kada tinan lima dala-ida,” nia katak.

Sekretáriu Rejionál ba Asuntu Administrasaun no Estatál, Martinho Abani Elo, introdús ba komunidade sira katak komitiva hosi CNE Nasionál halo abertura edukasaun sívika iha suku ida ne’e atu loke komunidade nia hanoin atu prepara partisipa másimu iha eleisaun parlamentár 2023.

Autoridade ne’e kompromete, nia parte sei kordena ho Sekretáriu rejionál ba Asunto Terra no Propriedade no Diresaun Notariado RAEOA, atu buka meiu oinsa bele koloka tékniku sira, atu destaka iha sub-rejiaun sira hodi bele fasílita komunidade sira atu trata dokumentu nasaun nian, hanesan billete identidade, sertidaun RDTL.

Xefe suku Malelat, José Marques, agradese ba CNE ho autoridade RAEOA, tanba hekbesik ba eleitór sira iha baze, atu fó hanoin nafatin, nune’e bele iha koñesimentu oinsa trata kartaun eleitorál ne’ebé lakon ka at inklui joven sira ne’ebé idade foin to’o 17, atu hakbesik ba Sekretáriadu Tékniku Administrsaaun Eeletorál.

Jornalista   : Abílio Elo Nini
Editór         : Evaristo Soares Martins

iklan
iklan

Leave a Reply

iklan
error: Content is protected !!