VIQUEQUE, 11 jullu 2022 (TATOLI)–Diretór Servisu Munisipál Patrimóniu no Lojístika (DSMPL), Filomeno da Crus, informa, parte diresaun rejista ona kareta Estadu 49 no motosiklu 393 iha munisípiu Viqueque.
“Diresaun Jerál no lojístika orienta ona ami atu halo identifikasaun dadus veíkulu ba determinasaun afetasaun númeru veíkulu Estadu iha munisípiu Viqueque. Nune’e, ami konsege konklui rejista rekapitulasaun veíkulu kareta Estadu no motosiklu iha liña ministeriál, órgaun autonómu, delegasaun kompeténsia no naun delegasaun kompeténsia, iha kareta 49 no motorizada 393 iha munisípiu Viqueque,” Diretór hateten ba Agência Tatoli, iha salaun aministrasaun munisipál, segunda ne’e.
Notísia relevante: Durante tinan-18 gasta millaun $257,8 ba kustu operasionál veíkulu Estadu
Aleinde ne’e, Diresaun konsege konklui identifikasaun no rejista veíkulu no motosiklu sira iha munisípiu Viqueque, ne’ebé tuir dadus hosi kareta Estadu 49, unidade 39 fahe ba operasionál no unidade 10 tama ba leilalun, enkuantu motosiklu hamutuk unidade 393, halo hela operasionál hamutuk unidade 270 no unidade 123 tama ba leilaun.
Nune’e mós, kareta pick up double sigle cup hamutuk unidade 46, trek hosi Ministériu Agrikultura no Peska (MAP) munisípiu Viqueqeu unidade ida no tratór boot 39 kompostu hosi tratór boot rua ho kondisaun di’ak, tratór boot a’at naton hamutuk 15 no trator a’at grave 22, trek tanke bombeiru kondisaun di’ak ida, trek mini ba saúde ho kondisaun di’ak ida, motosiklu ba xefe suku hamutuk na’in-36.
Bazeia ba rekapitulasaun patrimóniu Estadu veíkulu ba delegasaun kompeténsia iha liña ministeriál órgaun autonómu hamutuk kareta unidade 32 kompostu hosi operasionál 23, rekomenda ba leilaun unidade sia, motosiklu hamutuk 275 kompostu hosi operasionál 176, rekomenda ba leilaun hamutuk 99, kareta pick up double sigle cup hamutuk 30.
Jornalista : Vitorino Lopes da Costa
Editora : Julia Chatarina
