Embaixada identifika funsionáriu públiku balun bá buka serbisu iha Portugal
DILI, 11 jullu 2022 (TATOLI)-–Ministra Negósiu Estranjeiru no Kooperasaun (MNEK), Adaljiza Albertina Xavier Reis Magno, hateten, Embaixada Timor-Leste iha Portugal identifika funsionáriu públiku balun bá buka serbisu iha Portugal.
“Timor-oan sira balun bá iha Portugal ne’e, balun serbisu hela iha Timor, balun funsionáriu públiku no balun serbisu iha empreza balun,” Ministra hateten ba jornalista sira hafoin relata serbisu ba Primeiru-Ministru, Taur Matan Ruak, relasiona ho timor-oan balun abandona iha Portugal iha Palásiu Governu, segunda ne’e.
Notísia relevante: Timor-Leste no Portugal sei ofisializa akordu bilaterál fasilita timor-oan ba serbisu
Governante ne’e haktuir, foin lalais hala’o vizita bá Portugal, iha ámbitu ne’e hasoru timor-oan sira ne’ebé daudaun bá serbisu iha Portugal maibé hasoru problema.
“Ha’u hasoru sira balun iha Portugal, ha’u hateten ona katak bainhira kondisaun ladi’ak bele filafali bá Timor, tanba susar tebes hetan serbisu di’ak no manán osan di’ak. Tanba sira (sidadaun) laiha garantidu, sé mak lori sira, dehan saida ba sira, ha’u lahatene ida-ne’e, maibé bá iha ne’ebá laiha garantia serbisu, laiha kontratu ho ema ida entaun sira ema bele aproveita sira, katak selu ho osan kiik, laiha kontratu no iha mós la selu tuir kontratu tanba laiha garantia, eseptu iha organizasaun ida asegura, hafoin husu ajuda Governu, entaun Governu ho Governu mak bele ko’alia ba malu atu tau-matan maibé sira bá nonok de’it mak hasoru problema, Governu la’o haleu Portugal hodi buka sira,” nia akresenta.
Nune’e, Ministra apela sé de’it mak atu bá serbisu iha rai-li’ur, tenki iha ona garantia kontratu no hetan vistu, inklui tenke rejistu kedas rekezitu sira ne’ebé Governu Portugal fó.
“Sé ilegál ne’e problema boot liután. Governu la’ós bandu atu labele bá maibé bainhira iha garantia katak sei hetan serbisu entaun bele bá. Governu iha inisiativa, tanba ne’e mak buka tuir sira no haruka rejista, nune’e karik iha problema ruma, bele hatene sira hela iha ne’ebé hodi buka tuir, balun hakarak fó balun lae, sira la fó tanba hanoin Governu atu deporta sira, maibé iha li’ur ona Governu laiha forsa atu deporta, sé mak iha direitu ne’e rai ne’ebé sira hela bá, Governu Timor só ajuda trata asuntu konsulár,” nia fó hanoin.
Akordu bilaterál sei iha prosesu negosiasaun
Biban ne’e, Ministra esplika kona-ba prosesu negosiasaun asina akordu bilaterál ho Portugal daudaun iha hela prosesu negosiasaun.
“Asina akordu ho Governu Portugal sei iha faze negosiasaun, maibé sei han tempu oituan tanba Portugal halo ba ita, ita mós tenke halo fali ba sira, katak resiprosidade, ne’ebé sei iha negosisaun, bainhira loos ona no sira aseita maka sei asina tanba sira halo tratamentu ba ita-nia traballadór iha Timor, ita mós tenki halo tratamentu hanesan mós sira-nia traballadór iha ne’e,” nia salienta.
Daudaun ne’e, Embaixada Timor-Leste iha Portugal rejista timor-oan iha Portugal hamutuk 200 resin.
Jornalista : Antónia Gusmão
Editora : Julia Chatarina
