DILI, 11 jullu 2022 (TATOLI)—Prezidente Konsellu Veteranu Munisípiu Lautém, Aurélio Freitas Ribeiro ‘Africoro’, hateten Governu integra veteranu grau 0-3 no 0-7 ne’ebé la simu subsídiu kada fulan ne’e iha vida ekonómika, nune’e bele dezenvolve ekonomia no bele sustenta família.
Notísia Relevante: Rai Los: Planu Governu integra veteranu iha vida ekonómika seidauk implementa
“Objetivu hosi polítika VIII Governu Konstitusionál ne’e mak oinsá atu kria kondisaun ba kombatente sira, nune’e bele dezenvolve vida ekonómika ba kombatente ne’ebé lahetan benefísiu mensalmente,” Aurélio Freitas Ribeiro “Alfricoro” hateten ba Agência TATOLI, liuhosi telefónika.
Governu nia polítika atu fó osan $20.000 ba kada grupu veteranu iha munisípiu sira-ne’e bele buka moris liuhosi kria grupu negósiu, hodi bele integra veteranu sira iha vida ekonómika no sosiál.
“Governu integra veteranu iha vida ekonómika ne’e foin mak hahú no antes ne’e laiha. Maibé ita haree katak Gabinete Primeiru-Ministru liuhosi sosiedade sivil mak servisu hamutuk ho Konsellu Kombatente Libertasaun Nasionál mak foin inisia iha tinan ne’e,” nia dehan.
Ida-ne’e akontese tanba Governu no Estadu mós preokupa hela ba situasaun moris liu-liu ba kombatente sira-ne’ebé involve iha frente armada, klandestina no diplomata, liu-liu kombatente ne’ebé lahetan benefísiu.
Governu no Estadu mós preokupa hela, tanba ne’e VIII Governu Konstitusionál halo planu liuhosi Gabinete Primeiru-Ministru hamutuk ho Konsellu Kombatente Libertasaun Nasionál, atu fó apoiu ba benefisiáriu veteranu sira hodi haki’ak animál.
Maibé, nia dehan, planu ida-ne’e la’o tuir saida mak Governu implementa ona maibé sei hetan osan ne’ebé ho montante kiik.
Tanba ne’e, nia husu ba kombatente ne’ebé forma grupu atu simu apoiu hosi Governu ne’e ezekuta ho di’ak no halo servisu ho badinas no kuidadu, nune’e saida mak veteranu hakarak ne’e sai realidade.
Veteranu sira iha munisípiu Lautém, agora daudaun kria ona grupu neen (6) no kada postu administrativu iha grupu ida, ne’ebé kada grupu ne’e kompostu hosi ema 15 to’o 20 hodi hala’o atividade haki’ak animál.
Jornalista : Osória Marques
Editór : Cancio Ximenes