DILI, 11 jullu 2022 (TATOLI)—Governu liuhosi Ministériu Transporte no Komunikasaun (MTK) Ministériu Agrikultura no Peska (MAP) no Ministériu Petróleu no Minerál (MPM), segunda ne’e, hahú lansa atribuisaun voucher ba kombustível ba benefisiáriu sira.
“Ha’u hanoin loron ohin importante tebes tanba Governu bele halo ona lansamentu voucher ba ita-nia benefisiáriu sira hanesan rodaviáriu, áereu, marítima, agríkola no peska,” Ministru Transporte no Komunikasaun, José Agostinho da Silva, hateten iha salaun MTK.
Antes ne’e, Konsellu Ministru aprova dekretu-lei atribuisaun subsídiu kombustível no Prezidente Repúblika promulga ona, ne’ebé molok implementa iha ona instrumentu implementasaun liuhosi despaixu konjuntu entre ministériu implementadór programa.
“Atu garante ninia implementasaun iha terrenu, ha’u husu ba parte hotu hanesan tékniku sira hosi liña ministeriál relevante no benefisiáriu sira tenke kolabora kria ambiente di’ak hodi fasilita ezekusaun iha terrenu ne’e la’o ho di’ak to’o ba benefisiáriu ida-idak,” nia akresenta.
Notísia relevante: Governu sei kompleta lista molok implementa subsídiu kombustível
Orsamentu ne’ebé aloka ba ezekusan subsídiu kombustível faze dahuluk ne’e hamutuk millaun $1, ne’ebé MTK hetan $500.000 no MAP hetan $500.000
“Ba faze tuir mai, ita sei distribui tan ba benefisiáriu hotu bele hetan, tanba orsamentu alokadu no aprovadu agora, ita tama ba faze ezekusaun, entaun ita garante katak parte hotu sei asesu ba sira-nia direitu ho dignu,” Ministru garante.
Daudaun estasaun kombustível ne’ebé koopera ona ho Governu atu simu troka voucher ba kombustível hamutuk 18.
Iha fatin, Diretór Nasionál Transporte Terrestre (DNTT), António da Costa, hateten loron ida ka rua tuir mai, sira-nia parte sei halo preparasaun atu implementa programa ne’e tanba voucher ne’e barak mak seidauk asina.
“Bainhira implementa ona, ami-nia sistema kontrolu mak sei tun ba avizu iha terminál sira fó hanoin ba estasaun kombustível, nune’e labele hamosu erru ruma, karik mosu fallansu ruma tenke relata ba DNTT,” nia dehan.
Iha faze dahuluk, Transporte Terrestre ne’ebé sei asesu ba subsídiu ne’e hamutuk 4.129.
“Transporte sira ne’e kada karreta loron ida hetan litru 5, entaun ba fulan ida hetan litru 150, ba fulan-tolu litru 450, maibé daudaun ne’e ita haree uluk ba faze dahuluk nian, ne’ebé sei termina iha 31 jullu 2022 no ba faze sira seluk sei revoga diploma ne’ebé iha mak foin kontinua,” nia tenik.
Taxista, José Maria, hateten nia parte agradese ba Governu tanba ohin bele halo ona lansamentu ba voucher subsídiu kombustível hodi bele fasilita sira iha situasaun ne’ebé folin kombustível sa’e.
“Folin sa’e halo ami halai karreta mós susar, maibé ho apoiu ida-ne’e uituan ka barak ha’u agradese,” nia salienta.
Jornalista : Arminda Fonseca
Editora : Julia Chatarina
