Komunidade postu Ossu ho inisiativa harii ponte alternativa
VIQUEQUE, 11 jullu 2022 (TATOLI)–Komunidade suku Ossorua no suku Uagia ho inisiativa halo ponte alternativa hodi fasilita movimentu hakuur mota Bika-Kaileu, iha suku Ossurua, postu administrativu Ossu, munisípiu Viqueque.
“Mota Bika-Kaileu iha tempu udan sai risku ba komunidade, nune’e iha tempu udan estudante sira labele tuir aula aprendizajen tanba hakuur mota mak foin to’o iha eskola. Ho ida-ne’e, komunidade hamutuk ho inan-aman estudante sira sente difikuldade ba oan sira-nia estudu. Tanba ne’e, ha’u-nia komunidade hamutuk ho profesór sira ho inisaativa halo ponte tara ida hodi sai alternativa iha mota Bika-Kaileu,” Xefe suku Ossorua, Eduardo da Silva Freitas, hateten ba Agência Tatoli, iha suku Ossorua, sesta ne’e.
Notísia relevante: MOP orienta empreza normaliza ponte Lapara iha suku Uani-uma Viqueque
Autoridade lokál ne’e dehan, komunidade serbisu voluntáriu tama loron-tolu ona no daudaun progresu konstrusaun ponte hahú monta ona ai-rin no to’o agora badaen sira kontinua serbisu.
“Ita haree tempu udan estudante sira labele tama eskola hodi simu materiál, entaun profesór sira sente triste nune’e profesor sira hamosu hanoin ida hamutuk ho inan-aman sira atu kria ponte alternativu ne’e. Asaun ida-ne’e, hodi antisipa ba problema risku dezastre narurál, liuliu ba estudante sira-nia vida,” nia akresenta.
Estudantu hosi suku Ossorua no Uagia maka hakuur mota Bika-Kaileu bá eskola hodi partisipa prosesu aprendizajen iha Eskola Ensinu Báziku Filiál (EBF) Uagua.
“Bainhira atu kria ponte ne’e, ami halo koordenasaun ho parte eskola, nune’e kada estudante sira-nia inan-aman kontribui $5 no estudante $1 hodi realiza konstrusaun ponte,” nia tenik.
Autoridade suku ne’e argumenta, mota Bika-Kaileu sai preokupasaun komunidade hotu, maibé laiha atensaun hosi parte kompetente hodi kria ponte ruma hodi fasilita movimentu ema no transporte.
“Tanba ne’e, ha’u hanoin na’in-ulun sira presiza tau konsiderasaun ba preokupasaun sira-ne’e. Bainhira la kria ponte maka sei sai difikuldade bainhira atu halo movimentu. Estudante sira iha tempu udan tenke abandona eskola tanba laiha ponte hodi fasilita sira hakuur. Ha’u husu ba Governu sira hodi bele foti medida ruma tanba ida-ne’e problema sériu,” nia hato’o.
Jornalista : Vitorino Lopes da Costa
Editora : Julia Chatarina
