MAE halo selesaun pur méritu ba administradór Hatulia B no Lore
DILI, 11 jullu 2022 (TATOLI)—Governu liuhosi Ministériu Administrasaun Estatál (MAE) no Komisaun Funsaun Públika (KFP) sei halo selesaun pur méritu ba administradór foun rua ba postu administrativu Hatulia B, munisípiu Ermera no postu administrativu Lore, munisípiu Lautém.
“Funsionamentu administradór postu administrativu Hatulia B no Lore, ha’u hato’o ona pedidu ba Komisaun Funsaun Públika atu nomea administradór postu rua ne’e. Daudaun ne’e Ministériu Administrasaun Estatál realiza hela selesaun pur méritu, nune’e bele hetan administradór foun ba postu administrativu rua ne’e,” Ministru Administrasaun Estatál, Miguel Pereira de Carvalho, hateten, hafoin ramata reuniaun ho Primeiru-Ministru, Taur Matan Ruak, iha Palásiu Governu, segunda ne’e.
Notísia relevante: PN aprova proposta-lei divizaun adminsitrativa territóriu iha finál globál
Tuir Ministru, foin dadaun hatudu ezerse funsaun ba subtituisaun de’it, maibé atu sai administradór permanente presiza partisipa iha prosesu selesaun pur méritu, ne’ebé ministériu hamutuk ho KFP daudaun ne’e lansa hela prosesu.
“Tempu badak kandidatu sira sei tuir prova eskrita, hafoin pasa ba entrevista no ikus mai mellór kandidatu sei selesionadu sai administradór postu,” nia akresenta
Governante ne’e atualiza mós prosesu konstrusaun edifísiu administrasaun postu administrativu Hatulia B no Lore, ne’ebé fulan ne’e sei hatuur fatuk dahuluk, hafoin bele hahú ona konstrusaun.
Orsamentu ba konstrusaun edifísiu administrasaun postu entre $140.000 to’o $160.000.
Jornalista : Antónia Gusmão
Editora : Julia Chatarina
