MAE propoin revee lei eleisaun parlamentár
DILI, 11 jullu 2022 (TATOLI)—Ministériu Administrasaun Estatál (MAE) submete ona projetu alterasaun lei eleisaun parlamentár ba Prezidénsia Konsellu Ministru hodi tau ba ajenda reuniaun Konsellu Ministru hodi diskute no aprova.
“Atu realiza eleisaun parlamentár, Ministériu Administrasaun Estatál propoin ona ba Konsellu Ministru liuhosi Prezidénsia Konsellu Ministru hodi ajenda ba aprova alterasaun da-neen lei eleisaun parlamentár nian, nune’e lei ne’e sinkroniza ho lei eleisaun prezidensiál ne’ebé parlamentu aprova ona iha tinan kotuk molok realiza eleisaun prezidensiál,” Ministru Administrasaun Estatál, Miguel Pereira de Carvalho, informa hafoin reuniaun ho Primeiru-Ministru iha Palásiu Governu, segunda ne’e.
Notísia relevante: PN aprova lei importante balun iha lejizlatura dalimak
Objetivu alterasaun ne’e bázikamente sinkroniza ho lei eleisaun parlamentár no lei eleisaun prezidensiál hodi hadi’a.
“Ezemplu ida maka atu ba rejista sai hanesan eleitór iha sentru votasaun paralelu, antigamente tenki liuhosi prosesu naruk ida, maibé agora lae ona, propoin eleitór sira ne’ebé hakarak vota iha Dili imediatamente hato’o sira-nia aplikasaun ba Sekretariadu Tékniku Administrasaun Eleitorál (STAE),” nia akresenta.
Pontu importante seluk ne’ebé persiza rezolve iha lei eleisaun parlamentár ne’e tenke iha sentru votasaun paralelu sira, tanba iha lei eleisaun parlamentár agora la prevee estabelesementu sentru votasaun paralelu, ne’ebé atu aplika iha eleisaun tinan oin tenke halo revizaun ba lei eleisaun parlamentár.
Nune’e mós, introdusaun instituisaun sira ne’ebé maka ninia natureza jurídika ne’e hala’o monitorizasaun atubele monitoriza eleisaun parlamentár hanesan iha eleisaun prezidensiál, Governu introdús entidade públiku sira ne’ebé atribui kompeténsia iha monitorizasaun bele monitoriza.
Biban hanesan, Governante ne’e informa ba Xefe Governu ligadu ho preparasaun Órgaun Eleitorál ba eleisaun parlamentár ne’ebé sei realiza iha tinan oin.
“Ha’u ho Primeiru-Ministru ko’alia kona-ba planu Órgaun Administrasaun Eleitorál, liuliu Sekretariadu Tékniku Administrasaun Eleitorál nia preparativu sira ba realizasaun eleisaun parlamentár ne’ebé sei realiza iha tinan oin. Preparasaun STAE mak atualiza baze dadus no planu lojístiku,” nia salienta.
Jornalista : Antónia Gusmão
Editora : Julia Chatarina
