MNEK sei hasoru ómologu Indonézia hodi diskute kooperasaun Bilaterál

DILI, 11 jullu 2022 (TATOLI)-–Ministra Negósiu Estranjeiru no Kooperasaun (MNEK), Adaljiza Albertina Xavier Reis Magno, iha loron 15 jullu tinan ne’e sei hala’o vizita ofisiál ba Indonézia, hodi hasoru malu ho ninia ómologu Ministra Estranjeiru Indonézia, Retno Lestari Priansari Marsudi.

“Ha’u sei ba Indonézia iha loron 15 fulan ne’e, hodi hasoru malu ho ha’u-nia ómologu Ibu Ratna iha loron 18 jullu, durante hasoru malu ko’alia kona-ba kooperasaun bilaterál,” Ministra informa hafoin relata serbisu ba Primeiru-Ministru, Taur Matan Ruak, iha Palásiu Governu, segunda ne’e.

Notísia relevante: Vizita PR Horta sei hametin kooperasaun ho Indonézia

Aleinde ne’e, entidade rua ne’e mós ko’alia kona-ba negosiasaun fronteira terrestre no mós kandidatura Timor-Leste nian ba Konsellu Direitu Umanu.

“Asuntu seluk tan hodi haree filafali ita-nia reuniaun tinan-tinan hosi seniór ofisiál sira ne’ebé paradu tiha tanba COVID-19 bele kontinua filafali,” nia akresenta.

Timor-Leste no Indonézia sai kandidatu ba Konsellu Direitu Umanu, tanba ne’e maka liuhosi vizita ne’e husu atu Timor-Leste no Indonézia kampaña hamutuk para eleitu.

Ligadu ho vizita ne’e maka governante ne’e hasoru Primeiru-Ministru hodi informa liuliu preparativu sira relasiona ho vizita Prezidente Repúblika, José Ramos Horta, nian ba Indonézia iha loron 19 jullu 2022.

“Ha’u ho Primeiru-ministru ko’alia kona-ba preparasaun vizita Xefe Estadu ne’ebé sei ba Indonézia iha loron 19 jullu ne’e, entaun ha’u sei ba uluk, tanba dezde tomada pose hotu no naton ne’e COVID-19 tiha aplika Estadu Emerjénsia ita labele sai to’o agora hasoru, maski hasoru malu ona ho Ibu Retno iha okaziaun seluk maibé iha vizita bilaterál, hanesan mós nasaun viziñu besik liu seidauk entaun uza oportunidade ne’e ha’u sei ba vizita, akompaña Prezidente Repúblika nia vizita Estadu,” nia tenik.

Jornalista    : Antónia Gusmão

Editora        : Julia Chatarina