DILI, 11 jullu 2022 (TATOLI)—Diretór Jerál Servisu Koorpotivu iha Ministériu Saúde, Marcelo Amaral, hateten kontinua estende kontratu ba profisionál saúde hamutuk 1.000-resin tanba iha nesesidade hodi kontinua apoia servisu vasinasaun kontra COVID-19 iha territóriu nasionál.
“Profisionál Saúde hirak ne’e ita estende tan sira nia kontratu to’o fulan-dezembru tinan ne’e, tanba bazeia ba fundu COVID-19 ne’ebé iha atu kontinua apoiu programa vasinasaun ba komunidade hodi prevene COVID-19,” Diretór Jerál ne’e hateten ba Agência TATOLI iha Caicoli-Dili, segunda ne’e.
Saláriu ba pesoáls saúde na’in-1.000-resin ne’e sei kobre hosi fundu COVID-19 tanba sei hala’o vasina ba komunidade iha munisípiu hotu.
“Orsamentu iha fundu COVID-19 sei iha ne’e, Ministériu Saúde kontratu nafatin hodi sira hala’o servisu apoiu vasinasaun. Bainhira orsamentu fundu COVID-19 laiha ona, hafoin hapara sira nia kontratu,” nia akresenta.
Nia dehan daudaun atividade vasinasaun la’o nafatin iha territóriu nasionál, nune’e sira nia kontratu presiza prolonga tanba MS sei presiza profisionál hirak ne’e apoia iha programa imunizasaun COVID-19.
Profisionál Saúde sira atu hala’o serbisu iha izolamentu, sala kuidadu ho intensivu (Intensive Care Unit/ICU), kuarentena atu asegura fasilidade saúde ne’ebé Governu harii, tanba fatin la’os de’it ba COVID-19 maibé bele utiliza moras sira seluk hanesan iha kuarentena tasi tolu daudaun ne’e uza ba moras dengue.
Jornalista : Felicidade Ximenes
Editór : Florencio Miranda Ximenes
