Padre Manuel: Joven sira-ne’ebé serbisu rai-li’ur hetan esperiénsia foun
BAUCAU, 11 jullu 2022 (TATOLI) – Maske Timor-oan barak hasoru difikuldade barak iha rai-li’ur, maibé Padre Parókia Santo António Baucau, Manuel da Silva Ximenes, fiar katak joven hirak-ne’e sei hetan esperiénsia foun tanba atu sai susesu tenke ultrapasa situasaun oinoin.
Amu Pároku Santo António Vila Antiga, Baucau, Manuel da Silva Ximenes, Salezianu Dom Bosco (SDB), esplika, maske timor-oan barak hasoru problema maibé maoria joven sira-ne’ebé serbisu iha rai-liur iha ona esperiénsia no kontribui ekonomia rai-laran, liuliu família.
“Vantajen ba serbisu iha rai-li’ur mak hetan esperiensia foun hanesan disiplina, respeitu tempu no oinsá halo jestaun ba osan,” Padre Pároku Santo António Baucau hateten iha Vila Antiga, segunda ne’e.
Padre Manuel husu ba governu loke kampu traballu no apoia emprezáriu lókal atu redus númeru dezempregu iha Timor inklui kontinua politika kanaliza kadoras mai Timor-Leste tanba loke oportunidade ba sidadaun sira atu serbisu iha rai laran.
Nune’e mós Governu presiza fó atensaun sériu ba sálariu mínimu ba traballadór sira tanba durante ne’e iha sidadaun balun ne’ebé hetan serbisu iha rai-laran maibé kontinua sai buka serbisu iha estranjeiru tanba simu saláriu la sufisiente.
Tuir dadus tinan 2022 traballadór iha Korea Súl hamutuk na’in-595, Austrália na’in-1.260. Enkuantu seidauk iha dadus loloos kona-ba traballadór timor-oan sira iha Reinu Unidu, Portugál no nasaun seluk.
Jornalista : Natalino Belo
Editór : Evaristo Soares Martins
