COVALIMA, DESPORTU

Parlamentu Foinsa’e atribui sertifikadu ba estudante na’in-79 iha Covalima

Parlamentu Foinsa’e atribui sertifikadu ba estudante na’in-79 iha Covalima

Estudante sira simu sertifikadu hosi membru parlamentu foinsa’e. Imajen Tatoli/Celestina Teles.

COVALIMA, 11 jullu 2022 (TATOLI)–Parlamentu Foinsae atribui sertifikadu ba estudante na’in-79 ne’ebé finaliza formasaun iha fulan kotuk iha área diskursu públiku no Life Skils Base Education (LSBE).

“Ami atribui sertifikadu ba estudante sira na’in-79 ne’ebé tuir ona kursu iha área diskursu públiku no Life Skils Base Education (LSBE) iha fulan kotuk,” Prezidente Membru Parlamentu Foinsa’e (M-PFM) Covalima, Lucas Gusmão do Nascimento hateten ba jornalista sira, iha salaun Eskola Sekundaria Jeral Públika Suai, segunda ne’e

Sertifikadu ne’ebé atribui ba estudante hamutuk na’in-79 ne’e estudante sira mai hosi Eskola Sekundária Jerál Públika (ESGP, sigla portugés) hamutuk na’in-38 no Eskola Sekundária Katólika Ave Maria Suai (ESCAM) na’in-41.

Membru Parlamentu Foinsa’e (M-PFN) hanesan programa Governu ho nia legalidade rezolusaun Governu númeru 23/2009 kona-ba Parlamentu Foinsa’e (PFN) no rezoluzaun Governu númeru 47/2016 kona-ba alterasaun primeiru ba rezolusaun Governu númeru 23/2009.

Diretor Eskola Sekundária Jeral Públika (ESGP-sigla português) Suai, Francelino Freitas Carvalho, entrega sertifikadu ba estudante. Imajen Tatoli/Celestina Teles.

Diretor Eskola Sekundária Jeral Públika (ESGP-sigla português) Suai, Francelino Freitas Carvalho, hato’o agradese ba Membru Parlamentu Foinsa’e tanba fahe ona sira-nia matenek no esperiénsia.

“Ha’u hakarak hato’o agradese ba Membru Parlamentu Foinsa’e sira, liuhosi alumni Parlamentu foinsa’e ne’ebé mak fahe ona sira-nia matenek, fahe ona sira-nia esperiensia, tanba formasaun hirak ne’e importante,” nia dehan.

Reprezentante Estudante, Patrício Gusmão Xavier Amaral, hateten nia parte orgullu tanba Membru Parlamentu Foinsa’e bele fahe sira-nia esperiénsia hodi hasa’e sira-nia kuñesimentu ba estudante sira atu aprende.

Tanba ne’e, nia rekomenda ba Membru Parlamentu Foinsa’e atu kontinua kapasita foinsa’e sira liu-liu estudante sira atu banati no bele hetan esperiénsia hosi membru Parlamentu Foinsa’e sira.

Enkuantu formasaun ba estudante sira ne’e apoiu hosi Governu liuhosi Sekretáriu Estadu Juventude no Desportu (SEJD) hodi fó formasaun ba estudante sira.

 Jornalista : Celestina Teles

Editór        : Cancio Ximenes

iklan
iklan

Leave a Reply

iklan
error: Content is protected !!