HEADLINE, INTERNASIONÁL, SAÚDE

PM husu MS halo akordu ho ospitál públiku iha rai-li’ur

PM husu MS halo akordu ho ospitál públiku iha rai-li’ur

Ministra Saúde, Odete Maria Freitas Belo. Imajen Tatoli/António Daciparu

DILI, 11 jullu 2022 (TATOLI)—Primeiru-Ministru (PM), Taur Matan Ruak, husu atu Governu liuhosi Ministériu Saúde (MS) selebra akordu ho nasaun sira hanesan Malázia, Singapura no Indonézia hodi fó tratamentu ba pasiente sira ne’ebé halo transferénsia.

“Kona-ba transferénsia pasiente bá rai-li’ur, durante ne’e ospitál sira ne’ebé Governu halo akordu ne’e barak liu ospitál privadu. Primeiru-Ministru husu sé bele no di’ak liu Governu tenki iha akordu mós ho ospitál Governu nian,” Ministra Saúde, Maria Odete Freitas Belo, hateten, hafoin ramata reuniaun ho Primeiru-Ministru, iha Palásiu Governu, segunda ne’e.

Notísia relevante: Mudansa sistema administrasaun-lojístika difikulta transferénsia pasiente ba estranjeiru

Nune’e, Ministra Saúde  konkorda ho pedidu Xefe Ezekutivu no sei realiza serbisu ne’e.

“Ministériu Saúde hakarak atu haree ida-ne’e tanba iha governasaun uluk mós ita iha ona akordu ho ospitál públiku iha nasaun sira ne’e, ne’ebé hakarak atu haree elabora filafali lala’ok serbisu durante ne’e oinsá, liuliu vantajen no dezvantajen, atu nune’e ita mós iha posibilidade atubele serbisu hamutuk,” nia akresenta.

Tanba ne’e, nasaun ne’ebé Governu planeia atu halo akordu maka nasaun sira ne’ebé durante ne’e Governu halo kontratu ona.

“Sei iha kontratu ho nasaun hanesan, la’ós ho ospitál privadu maibé ospitál públiku, akordu entre Governu ho Governu,” nia tenik.

Durante ne’e Governu halo ona kontratu ho ospitál privadu iha Jakarta, Bali no Kupang (Indonézia) inklui Singapura no Malázia.

“Durante ne’e normalmente pasiente sira haruka ba iha ospitál sira ne’e,” nia salienta.

Jornalista   : Antónia Gusmão

Editora       : Julia Chatarina

iklan
iklan

Leave a Reply

iklan
error: Content is protected !!