PR apresia investimentu Telemor iha Timor-Leste
DILI, 11 jullu 2022 (TATOLI)—Prezidente Repúblika, José Ramos Horta, apresia ba investimentu operadór telekomunikasaun Telemor durante tinan 10 investe iha Timor-Leste.
“Apresia tebes ho Telemor hato’o apoiu tomak ba atividade sira-ne’ebé mak Telemor realiza durante tinan 10 ona iha Timor-Leste,” PR Horta hato’o hafoin hala’o enkontru ho Diretór Jerál Operadór Telemor, Tran Van Bang, ho ekipa hodi partilla existénsia operadór telekomunikasaun ne’e nia atividade durante tinan 10 iha Timor-Leste, iha Palásiu Prezidensiál Nicolau Lobato, Bairru Pite, segunda ne’e.
Xefe Estadu Timor-Leste ne’e admira Governu Vietname la’ós de’it ba istória ne’ebé nia iha maibé liu-liu iha parte evolusaun ekonomia no dezenvolvimentu ne’ebé hatudu durante ninia ezisténsia.
PR hato’o apoiu ba Vietnamita sira hotu ne’ebé hakarak mai investe iha Timor-Leste ho apoiu tomak iha ambitu rejionál, bilaterál, internasionál, no Prezidente Repúblika hakarak reforsa kooperasaun di’ak no forte liután ho Governu Vietname la’ós de’it iha ambitu dijitalizasaun teknolójika maibé liu-liu iha ambitu produsaun agrikula.
Iha fatin hanesan, Diretór Jerál Operadór Telemor, Tran Van Bang, hateten ohin hasoru malu ho Prezidente Repúblika dahuluk hato’o kongratulasaun ne’ebé hetan re-eleitu ba mandatu daruak nu’udar PR.
Nia dehan, durante sorumutu atualiza existénsia Telemor durante tinan 10 iha Timor-Leste hala’o atividade no investimentu ne’ebé iha setór telekomunikasaun, ne’ebé ko’alia kestaun Information Comunication Teacnolgy (ICT) iha Timor-Leste liu-liu servisu sira-ne’ebé oferese hanesan sinema, mosan no sira seluk.
Aleinde ne’e, nia hateten, Telemor iha vizaun no estratéjia oinsá mak introdús teknolójia internet 5G iha tempu oin mai hodi fornese rede ne’ebé di’ak liután ba kliente sira.
Tanba ne’e, nia hateten, kabu-submarinu ne’ebé Governu planea atu dada mai Timor-Leste, ida ne’e di’ak tebes sei fornese liña lala’is, mezmu nune’e hosi parte Telemor mós sei introdús teknolojia internet 5G ne’ebé sei lais mós.
Jornalista : Nelson de Sousa
Editór : Cancio Ximenes
