RAEOA hein autorizasaun Governu Sentrál kona-ba kontinuasaun projetu monumentu Lifau
OÉ-CUSSE, 11 jullu 2022 (TATOLI)–Autoridade Rejiaun Administrativa Espesiál Oé-Cusse Ambeno (RAEOA), lideradu hosi Arsénio Paixão Bano hein autorizasaun Governu Sentrál kona-ba kontinuasaun projetu monumentu Lifau ne’ebé paradu dezde 2016.
“Monumentu Lifau ne’e loos duni abandona hela, maibé ita hein hosi nasionál (Ministériu Turizmu, Komérsiu no Indústria) tanba prosesu seluk iha tribunál la’o hela, tanba uluk Ministru Fransisco Kalbuadi Lay maka kaer projetu ne’e, maibé to’o agora paradu hela, ita sei komunika ho Governu Sentrál atu kontinua obra ne’e oinsá,” Arsénio Paixão Bano, ko’alia iha Oé-Cusse, segunda nee’e.
Arsénio Paixão Bano haktuir, projetu ne’ebé paradu la’ós monument Lifau de’it, maibé inklui projetu balun hanesan, Otel Ambeno no jardín Oébau, nune’e autoridade RAEOA sei esforsa hodi komunika ho Governu Sentrál atu kontinua tanba ne’e gasta osan Estadu nian.
“Agora ita buka dalan atu rezolve, RAEOA hein de’it orsamentu atu kontinua, hanesan mós projetu ótel Ambeno, ne’e paradu tanba situasaun COVID-19, RAEOA nia fasilidade la sufisiente, Prezidente Autoridade daruak, José Luis Guterres, deside uza tiha ba kuarentena, entaun agora ita tenke reabilita atu uza, projetu jardín Oébau mós paradu momentu Governu anteriór mak halo,” nia afirma.
Projetu monumentu Lifau ne’e ezekuta hosi empreza nasionál Morizon Unipesoál Lda, ho valór orsamentu millaun $1.4, hahú ezekuta iha 2015 to’o 2016 maibé projetu ne’e abandona to’o ohin loron.
Jornalista : Abílio Elo Nini
Editór : Evaristo Soares Martins
