Servisu Saúde Covalima haruka ona pedidu rekonstrui moru ba MS
COVALIMA, 11 jullu 2022 (TATOLI)—Diretora Servisu Saúde Munisípiu Covalima, Maria de Fátima Moniz, informa nia parte haruka ona pedidu atu rekonstrui moru Sentru Saúde (SS) Suai ne’ebé monu afetadu hosi inundasaun ba Ministériu saúde (MS).
“Ami haruka ona proposta ho pakote, tanba ami submete kedas kompañia ne’ebé tuir kritéria tenke iha ekipamentu pezadu ne’ebé ami haruka ona iha semana kotuk no simu orientasaun hosi diretór jeral ho Ministra Saúde atu konstrui,” Maria de Fátima Moniz informa ba Agência Tatoli, iha nia knar fatin, Camanasa, segunda ne’e.
Maske haruka proposta ba Ministériu ho pakote hodi rekomenda kedas Kompañia Unindade Unipesoál, Lda, maibé hosi nasionál mak sei halo avaliasaun no foti desizaun ba kompañia ne’ebé atu rekonstrui hikas moru Sentru Saúde Suai ne’ebé monu ne’e.
“Kompañia ne’ebé prenxe rekezitu tenke iha ekipamentu pezadu tanba ne’e kompañia Unidade Unipesoál, Lda, mak prenze rekezitu, maibé ami submete ami-nia proposta ba nasionál sei halo avaliasaun maske ami tau ona kampañi nia naran,” nia hateten.
Udan boot ne’ebé akontese iha loron kinta (30/6) tinan ne’e iha munisípiu Covalima hamosu inundasaun no halo moru Sentru Saúde Suai metro 29 monu no estraga ekipamentu saúde hanesan livru rejistu inan isin-rua, imunizasaun no aimoruk tableta 14 mak bee lori.
Ho nune’e, iha sesta (01/07), Ministra Saúde, Odete Maria Freitas Belo ho nia ekipa tun kedas ba tereñu hodi halo observasaun direta ba inundasaun ne’ebé afetadu ba Sentru Saúde Suai hodi hamonu moru no estraga ekipamentu Sentru Saúde sira.
Notísia Relevante: Ministra Saúde observa Sentru Saúde Covalima afetadu ba inundasaun
Jornalista : Celestina Teles
Editór : Cancio Ximenes
