COVALIMA, 12 jullu 2022 (TATOLI)–Bee Timor-Leste, Empreza Publika (BTL, E.P) Covalima la distribui bee-moos ba komunidade tanba bomba sentrál distribuisaun bee-moos iha Sukabi-Laran, suku Suai Loro ne’e avaria.
“Ami-nia bomba sentrál distribuisaun bee-moos ba komunidade ne’e, hahú iha tersa (05/07) to’o ohin loron, ami labele halo operasaun hodi halo distribuisaun bee-moos ba komunidade iha Suai, tanba bomba sentrál avaria durante semana ida ona,” Ofisiál Apoiu Kliente Bee Timor-Leste, E.P, Cipriano Amarál Soares, hateten ba jornalista sira, iha nia knar fatin, Kampung Baru, tersa ne’e.
Ho nune’e, Tékniku BTL, E.P nasionál halo ona levantamentu dadus no identifika ona bomba sentrál ne’ebé avaria hodi buka dalan, atu bele rezolve no hato’o ona relatóriu ba nasionál.
“Bomba avaria ita bele hatene dehan impaktu halo operasaun durante loro-loron. Ita halo operasaun hela deit, entaun halo makina bomba bee ne’e avaria. Ita uza bomba ne’e la’ós bomba foun maibe bomba antigu ona maibé funsiona ho di’ak, tanba ita halo operasaun durante oras 24 kada loron,” nia dehan.
Hafoin bomba bee nian avaria, BTI, E.P mós fó informasaun ba komunidade liuhosi avizu ba públiku iha Suai, tanba BTL, E.P seidauk bele halo distribuisaun bee-moos to’o bomba sentrál bee ne’e hadi’a fali.
“Ami mós hato’o ona relatóriu eskrita, ami hato’o ona ba iha nasionál hodi buka dalan bele rezolve situasaun ne’e. Tanba, ekipa atu kontrola, ita tau de’it iha sentrál, ho nune’e ekipa tun halo identifikasaun ramata ona, segunda semana oin atu rezolve ita-nia problema ne’e,” nia hateten.
Jornalista : Celestina Teles
Editór : Cancio Ximenes
